Bamkhomba kuZalo uBaby Cele
AKAYITHI vu eyokujoyina kwakhe isizini yesine yomdlalo Uzalo umlingisi osezakhele igama ekulingiseni, uBaby Cele.
AbakwaSABC1, izolo bakhiphe isitatimende beqinisekisa ukuthi uBaby uzoba kwabalingisa kulo mdlalo kusukela ngonyaka ozayo.
Yize kungaveli ukuthi uzolingisa indawo kabani kodwa kuvele ukuthi baningi abalingisi abasha abazobonakala emdlalweni.
Ekhuluma neSolezwe izolo uBaby uthe kukhona izinto abangavumelekile ukuthi bakhulume ngazo okwamanje.
“Ngisacela nithinte ihhovisi ngalolu daba,” kusho uBaby.
Isitatimende siveze ukuthi ngoFebhuwari kuzoqala isizini entsha yoZalo oluthandwa ngabantu abaningi.
Isizini entsha kulindeleke ukuthi iqale ukushuthwa ngenyanga ezayo njengoba abalingisi besahlabe ikhefu.
UPepsi Pokane ongomunye wophrojusa uthe: “Kuzobonakala abalingisi abasha futhi abanye bayaziwa njengoba uBaby Cele ezoba yingxenye yomdlalo.”
Sekuyindaba eyaziwayo ukuthi uSihle Ndaba odlala indawo kaSmangele Maphumulo noLeleti Khumalo onguZandile “MaNzuza” Mdletshe bayashiya kuZalo.
USihle uzolingisa efilimini entsha eqoshelwa eThekwini ethi Love Lives Here.
Isitatimende asizange siyiphathe ekaSindi Dlathu naye okhonjwa kuZalo.
UBaby useke walingisa emidlalweni okubalwa kuyo iBackstage, Zabalaza, Saints and Sinners, Ring of Lies neminye.