Sekushone omunye kwabangqongqe emijondolo
SEBEPHELELWE yithemba lokuthi uMasipala weTheku uzobafakela ugesi abahlala emijondolo ekuForeman, eSydenham.
Kule ndawo kushe imijondolo elinganiselwa ku-800 kwasala abantu abangu-2000 dengwane ngeSonto. Kusolwa ukuthi umlilo wokhelwe yikhandlela ebelingacishiwe.
Kushone uSisipho Xulu (2) noyise uMnuz Eric Mpanza kulesi sigameko kanti unina uNksz Mbali Xulu usesimeni esibucayi esibhedlela.
UNkk Agnes Sigcau, oseshelwe wumjondolo wakhe kasishiyagalolunye, uthe akasenalo ithemba lokuthola ugesi noma olwendlu yomxhaso.
“Uma kushile angisazihluphi ngokuthi ngilinde usizo oluqhamuka kwamasipala ngithenga uthayela ngizakhele umjondolo wami. Izinombolo zikamazisi wami sengizazi ngekhanda, ngenzela ukuthi uma kwenzeka kusha, ngishaye omunye,” kusho yena.
Into emkhathazayo ukuthi kulokhu kushe i-timetable nezincwadi zomzukulu wakhe uYanga Sigcau ofunda u-matric eBurnwood High.
Izolo uYanga ubematasa akha kabusha umjondolo ahlala kuwo nogogo wakhe nonina. Uthe akakayi kobika esikoleni ukuthi kushe i-timetable yakhe.
“Bengisafuna ukwakha ukuze sibe nendawo yokulala. Ngizobhala iHistory ngoLwesithathu,” kusho uYanga.
UNksz Nomonde Sinukela, naye oseshelwe wumjondolo izikhawu eziningi, uthe omazisi bezingane zakhe ezintathu ulala nabo enzela ukuthi uma kusha aphume nabo.
“Asizithengi izimpahla eziningi senzela ukuthi uma kunethuba sikwazi ukubaleka nazo zonke izimpahla zethu,” kusho yena.
UNksz Sinukela uphume nombhede nezingubo zezingane zakhe ngesikhathi kusha.
“NgeSonto ngilale esizeni sami nomakhelwane kuwo umbhede ngoba itende esinikwe lona belihlanganise abantu besilisa nabesifazane.
UNksz Sinukela uthe naye akasenalo ithemba likagesi abebethenjiswe ukuthi ungase ufakwe.
Uthe izinombolo zemijondolo abebesanda kunikezwa zona bebengakazazi. Abebebhalisa imijondolo eshile bafuna inombolo yomjondolo.
UMnuz Mqapheli Bonono, wabaHlali baseMjondolo, uthe kunenkombankombane phakathi kwekhansela nezikhulu zophiko lokuhlaliswa kwabantu kwamasipala mayelana nokuthi ugesi uzofakwa nini.
Ikhansela uMnuz Mahomed Hassan Haniff lithe uMasipala weTheku awufuni ukuphumela obala ngodaba lukagesi emijondolo yakuForeman.
“Uma kunemihlangano yomphakathi kufika abantu abangekho eminyangweni ethintekayo bathembise umphakathi izinto ezinkulu. Le nto ingiqhatha nomphakathi ogcina usumashela mina ufuna lezi zinto othenjiswe zona. Yingakho ngithe umnyango wokuhlaliswa kwabantu awufike uzokhuluma nomphakathi ucacise ngalolu daba,” kusho uHaniff.
Inhloko yezokuxhumuna kuMasipala iTheku, uNksz Tozi Mthethwa, esitatimendeni asithumele Isolezwe uthe kusaphenywa ngembangela yomlilo. “Okwamanje babalelwa ku-933 abantu abasale dengwane kodwa kulindeleke sinyuke isibalo ngoba abanye bebehambile kuyimpelasonto.”