Uyaxolisa owama-Idols ophunyukwe yiqatha
UKUHAQWA wumunyu ngoba ezizwa sengathi ubahlinzele ezibini abazali bakhe abangasekho nendodana yakhe nayo eseyadlula emhlabeni, kuholele ekutheni uMthokozisi Ndaba, olale isibili kuma-Idols enze into naye angakakholwa ukuthi uyenzile.
Leli bhungu laKwaMashu elineminyaka engu-25 likhiphe isitatimende izolo lapho beligeqa amagula ngakho konke okwenzekile okuholele ekutheni liziphathe ngendlela engahloniphekile. Uqale ngokuxolisa kwabezindaba. Uxolise nakuPaxton Fielies waseKapa (odle umhlanganiso) obekumele ahambe naye kuzo zonke izindawo okuyinto egcine ingenzekanga.
“Kunzima kimina ukuthi ngingakuchaza kanjani okwenzekile kodwa kusemqoka ukuthi ngiqale ngokufongqa isigqoko ngixolise kuwona wonke umuntu engimphathe kabi nobone sengathi anginanhlonipho. Ngizizwa sengathi abazali bami nendodana ngibaphoxile,”kusho uMthoko.
Uthe ube sehlele ukwenza okuningi ngomklomelo abethi uzowuthola futhi ube wufuna ngendlela emangalisayo.
“Imibiko ethi angimhalaliselanga uPaxton ayilona iqiniso. Angiyena umuntu ongakwazi ukubongela omunye uma kukhona okuhle okumvelele. Abanye ozakwethu kuTop 10 ngesikhathi beza esiteji bezohalalisela le ntokazi mina ngibone kungcono ngiphume ukuze isale ithokozela umzuzu wokuwina kwayo,” kuchaza uMthoko. Ubonge ithimba elihlela ama-Idols ngethuba lokukhombisa ngethalente lakhe, wathi luningi ulwazi aluncelile emculweni kulolu hlelo. Uphinde wabonga abantu bakuleli abalokhu beqhubekile nokuthenga ingoma yakhe ethi “Masithandane” ku-ITunes, njengoba ilokhu iqhubekile nokuqhwakela esicongweni.