UTeko ugeqa amagula ngeshobolo encwadini
SIGEQA amagula ngempilo yaso isilomo somdlali esidume kwiBafana Bafana, uTeko Modise, okuke kwasolwa ukuthi siloyiwe ngemuva kokulandelwa ngamabhadi ngesikhathi sisayibamba kwi-Orlando Pirates.
UModise (34) osegijima kwiCape Town City, usekhiphe incwadi ekhuluma ngempilo yakhe. Isihloko sale ncwadi sithi Inside: The Curse of Teko Modise.
Le ncwadi itholakala esitolo sezincwadi i-Exclusive Books ngo-R200.
Ubunzima abhekane nabo uModise empilweni yakhe nasebholeni bumenze wagcina esekholwa wukuthi uloyiwe. Lokhu kuyavela encwadini yakhe.
Encwadini ebhalwe uNikolaos Kirkinis kuvela ukuthi uModise, owazakhela igama kwiPirates, Mamelodi Sundowns nakwiBafana Bafana wagcina esegxila nasezinkambeni zikaFaro ngenxa yokunakashelwa ngabezindaba ngemuva kokuhlukanisa nowayengunkosikazi wakhe, uFelicia Modise.
Eminye imibiko yayiveza ukuthi ifindo ligqashuke ngoba lo mdlali esolwa ngokuthandana nabantu abanobulili obufanayo nobakhe.
Emaphephandabeni angempelasonto bekuphuma imibiko ethi udlelwe imizi futhi unezikweletu.
Lokhu kwenzeke ekubeni lo mdlali wake wahambela phezulu kubhekwe kwiNdebe yoMhlaba yango-2010 esayina inkontileka yezizumbulu nabakwaMcDonald kangangoba waze wathenga unyanyavu lwemoto i-Aston Martin.
Imenenja yakhe, uJazzman Mahlakgane, itshele Isolezwe ukuthi bathathe isinqumo sokuqamba le ncwadi ngeCurse of Teko Modise ngoba base beqale ukukholwa wukuthi uModise uloyiwe.
“Kuningi obekuphuma kwabezindaba ngesikhathi izinto zingamhambeli kahle empilweni uTeko. Akazange alithole ithuba lokuthi aziphendulele ngezinsolo ebezibhalwa ngaye.
Ngihlale naye phansi ngambuza ukuthi kungaba njani uma engabhala incwadi achaze cishe ngazo zonke izigameko ezazibhalwa ngaye ngesikhathi izinto zimbhedela. Phela nathi sase siqala ukukholwa wukuthi mhlawumbe uloyiwe ngempela,” kusho uMahlakgane.
Kule ncwadi kuvela ukuthi uModise wacelwa wukhokhovula lwenyanga yaseCongo ukuba lumlungisele izinkinga zakhe.
Nangempela ngemuva kokubonana naleyo nyanga izinto zakhe zaqala ukukhanya njengoba edle izicoco ezimbili ze-Absa Premiership, eseNedbabnk Cup, CAF Champions League neseTelkom Knockout neMamelodi Sundowns.