Abandawonye babanga isidumbu
SEBEFAKANE enkantolo yenkosi abomndeni ababanga isidumbu sikanina esangcwatshwa ngo-2008 emzini wendodakazi yakhe eshadile eLangeni, eBhamshela.
UNkk Minas Shangase waseBhamshela ukhala ngomfowabo uMnuz Gabangani Kubisa athe usemfake enkantolo yenkosi yendawo ngenxa yokuthi wangcwaba unina emzini wakhe ngo-2008.
Uthe unina, uNkk Maralda Kubisa, wayehlala kwakhe ngesikhathi egula kwathi esezoshona baya kubameli eVerulam bayobhala incwadi yokuthi uyavuma ukuthi angcwatshwe emzini wendodakazi yakhe kwaShangase.
Ngaleso sikhathi uthe umfowabo wayengafuni ukuzihlanganisa nonina.
UNkk Shangase uthe uthole incwadi evela enkantolo yenkosi ngesonto eledlule imbiza ukuze kuthethwe icala lokuthi wangcwaba unina egcekeni lalapho eshadele khona. Icala lizongena ngeSonto.
“Mina ngangithi ngiyasiza ngoba umama wayesegula futhi ehlala nodadewethu ababili abakhubazekile bengakwazi ukumnakekela. Enye inkinga wukuthi wayehlushwa yizigebengu, zimgqekezela njalo uma kade ephuma kohola imali yempesheni, zimkhombe ngezibhamu zifune imali. Ngabona kungcono ukuthi ngimthathe ayohlala kwami,” kusho uNkk Shangase.
Udadewabo kaNkk Shangase, uNksz Thembisile Kubisa, uthe umfowabo owakhe eduze nakubo ubengabanaki uma kade bengenelwe yizigebengu
nonina. “Noma esegula ubengezi ukuzombona. Sabona kuwumqondo omuhle ukuthi umama ayohlala nodadewethu futhi nosbali akabanga nayo inkinga ngalokhu waze wayombika enkosini yendawo, uNgcobo.”
Uthe akazi umfowabo bamenzani ngoba akabafuni nokubabona kanti kwathi noma bemfonela sekushone unina izingcingo zakhe zazingangeni.
“Saze sathumela izingane ukuthi ziye kwakhe ziyombikela ukuthi umama useshonile kodwa wathi ngesikhathi egula samthatha singamazisanga lutho,” kusho uNksz Kubisa.
UKubisa uthe akakaze axabane nodadewabo njengoba sebenza sengathi kukhulu okubangwayo.
“Ngaze ngacela ukuthi sibe nomhlangano njengomndeni kodwa akwenzekanga ngoba bathi ayikho into abangayikhuluma nomuntu ongabanga nendaba nonina esaphila,” kuchaza uKubisa.
Uthe uyise udaba enkantolo yenkosi ngoba efuna ukuthi kumbiwe isidumbu sikanina siyongcwatshwa kubo (emzini kanina) hhayi emzini kadadewabo lapho singcwatshwe khona.
Uthe kwakumphethe kabi ukuthi unina wayedlala izigebengu kodwa naye wayenomuzi wakhe engeke akwazi ukuhlala naye.
Isolezwe lizame kaningi ukuthinta inkosi uMlamuli Ngcobo okubizelwe enkantolo yakhe uNkk Shangase kodwa ucingo belungabanjwa. Ube esethunyelwa i-sms kodwa nayo yangaphendulwa. Ucingo lugcine seluvaliwe.