Ukubuyekezwa kweziqu ngeke kuphazamise abafundi
INYUVESI yaseZululand, oNgoye ithi ukubuyekezwa kweziqu zomthetho okwenziwa wumkhandlu iCouncil for Higher Education (CHE) ngeke kuphazamise izinhlelo zokwamukelwa kwabafundi abazokwenza lezi ziqu ngonyaka ozayo.
Le nyuvesi ithi lokhu kubuyekezwa akunamthelela otheni kubafundi abenza lezi ziqu nalabo asebathola iziqu zomthetho kule nyuvesi.
Okhulumela le nyuvesi, uNksz Gcina Nhleko uthe ngeke siphazamise isimemezelo se-CHE sokuthi uma inyuvesi ingahlangabezani nemibandela ethile ethinta ukufundiswa kwalezi ziqu kuyibeka engcupheni yokuphucwa ilungelo lokufundisa lezi ziqu.
Uthe lo mkhandlu ubuyekeza zonke iziqu zomthetho ezenziwa emanyuvesi ahlukene akuleli. “Inyuvesi izoqhubeka nokuthuthukisa izinga leziqu zomthetho njengoba isikhiqize inqwaba yabameli abahlonishwayo. Ngonyaka ozayo siyaqhubeka nokwamukela abafundi abazokwenza lezi ziqu.”
Usho lokhu nje i-CHE inike amanye amanyuvesi kuleli enzisa lezi ziqu umyalelo wokuthi alungise okuthile okuthinta ukufundiswa kwalezi ziqu ungakapheli uMeyi 2018 noma aphucwe ilungelo lokufundisa lezi ziqu.
UNksz Nhleko uthe bamatasa balungisa izinto ezifunwe yi-CHE.
“Sihlele ukuthi sihlangane ne-CHE ngoDisemba ukuze siqinisekise ukuthi uhlelo lokulungisa lapho lo mkhandlu ofuna sigxile khona luyalungiswa kulo mhlangano. Inyuvesi isanelungelo lokufundisa lezi ziqu ze-LLB yingakho sizoqhubeka sihlinzeke abafundi ngeziqu ezisezingeni. Okwamanje asikaphucwa ilungelo, sisathole incwadi ethi uma izinto ezithile zingalungiswa zizophucwa leli lungelo,” kusho uNksz Nhleko.
Akulona kuphela uNgoye okumele lulungise izinto i-CHE ekhale ngazo kodwa nenyuvesi yaseKapa nayo isengcupheni yokuthi iphucwe iziqu uma kungukuthi ayizilungisi lezi zinto.
I-Unisa ne-UKZN ngamanye amanyuvesi agunyazwe yi-CHE ukuthi aqhubeke nalezi ziqu ngemuva kokuhlangabezana nemibandela yalo mkhandlu.