Imibuzo ngomtholampilo okulindwe wakhiwe
SEKUNEMIBUZO ngomtholampilo waseMpolweni, eMshwathi, osekuneminyaka engu-12 kulindwe ukuthi wakhiwe.
Kuthiwa isoyi lokwakhiwa komtholampilo lahlatshwa ngo2005 ngesethembiso sokuthi uzokwakhiwa maduzane.
Amalungu omphakathi wakule ndawo aphoqeleka ukuthi aye emtholampilo ongumahamba nendlwana ngoba ungekho umtholampilo.
UNkk Ncamisile Nkwanyana oyilungu lesishayamthetho le-DA uphonsele uNgqongqoshe wezeMpilo KwaZuluNatal, uDkt Sibongiseni Dhlomo inselelo ngokwakhiwa kwalo mtholampilo.
Uthe kumele uDhlomo achaze kabanzi ngokuthi yashonaphi imali eyayibekelwe ukwakha umtholampilo njengoba kwahlatshwa isoyi.
Uthe umphakathi waseMpolweni uyahlupheka ngoba awunawo umtholampilo. Kuthiwa indawo eyayibekelwe ukuthi kwakhiwe kuyo umtholampilo seyize yaba yihlathi njengoba kungekho osekwenziwe okukhombisa ukuthi kukhona okuzokwakhiwa kuyo. UNkk Nkwanyana uthe THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. kwachithwa imali yabakhokhi bentela kuphendulwa isoyi kodwa kwangakhiwa.
“Uma kunesidingo kufanele ungqongqoshe wezempilo owahlaba isoyi aphekwe ngobhojwana, achaze ukuthi yashonaphi imali ngoba kwakungeke kuhlatshwe isoyi imali yokwakha umtholampilo ingekho. Ngakho-ke sifuna lo mtholampilo wakhiwe ngokukhulu ukushesha njengoba sekwaphendulwa isoyi. Imali yokwakha ayiphume lapho ivalelwe khona. Uma yasetshenziselwa okunye uNgqongqoshe uDinangwe kufanele abone ukuthi uyithathaphi ngoba thina sifuna umtholampilo eMpolweni,” kusho uNkk Nkwanyana.
Ikhansela lakuleya ndawo uNkk Cebile Zuma-Dube lithe ngesikhathi kuhlatshwa isoyi babezitshela ukuthi kusho ukuthi kuzokwakhiwa.
“Ngesikhathi kuhlatshwa isoyi ngangingakabi yikhansela nami. Njengoba sengiyikhansela umphakathi usuke wangijuba wathi angibuze ngalo mtholampilo. Sengibuzile ngatshelwa ukuthi imitholampilo iyokwakhiwa ngo-2020 ngoba ayikho imali. Okusixakayo ukuthi kwahlatshwa isoyi nokusho ukuthi yayikhona imali yokwakha ngoba alihlatshwa isoyi ingekho imali,” kusho uNkk Zuma-Dube.
Uthe amalungu omphakathi asephelelwe yisineke njengoba sesiside isikhathi elindile.
Okhulumela uMnyango wezeMpilo, uMnuz Desmond Motha uthe yize umnyango usebenza esikhathini esinzima ngokwezezimali uzimisele ngokuhlinzeka izinhlelo zezempilo ezisezingeni esifundazweni sonke.
Uthe uMnyango wezeMpilo uzimisele ngokuwakha eminyakeni emihlanu ezayo umtholampilo kule ndawo.
“Ukuqinisekisa ukuthi izinhelo zezempilo aziphazamiseki siyaye sithumele umtholampilo ongumahamba nendlwana njalo ngesonto. Lo mtholampilo unakekela abantu abangu-300 njalo ngesonto,” kusho uMotha.