Ingase ibe nenkinga imeya enemisebenzi emibili
INGASE ibe sobishini iMeya yoMkhandlu waseMzinyathi, uMnuz Petros Ngubane osekuvele ukuthi ibuye yenze umsebenzi wokuba nguthishanhloko.
Ngaphandle kwalezi zinsolo, uNgubane ubuye asolwe nangokugxambukela ekuqokweni kosonkontileka abazosebenza nomkhandlu wakhe.
Kuthiwa ufuna kunikwe umsebenzi osonkontileka abaseka iqembu ngemali uma kunemikhankaso.
NgoJuni 13, uMkhandlu waseMzinyathi kuthiwa wathatha isinqumo sokuthi iMeya, iPhini layo noSomlomo baqashwe ngokugcwele kodwa iMeya ayizange yesule ekubeni nguthishanhloko.
Ngokomgomo wokusebenza kwemikhandlu, ikhansela eliqashwe ngokugcwele alivumelekile ukwenza imisebenzi emibili.
Ethintwa uNgubane omele i-IFP emkhandlwini akaphikanga ukuthi ubuye abe nguthishanhloko.
“Bengivele nginguthishanhloko ngaphambi kokuthi ngibe imeya noMnyango wezeMfundo ngawubikela ngalokho. Akufihliwe ukuthi nginguthishanhloko,” kusho uNgubane. Uthe usebe nguthisha kusukela ngo-1986. “Laba bantu abakhuluma leyo nto imiphuphe engenayo inqubekela phambili,” kusho uNgubane.
Mayelana nokuthi ubuye agxambukele ekuqokweni kosonkontileka, ukuchithile lokho wathi ngamanga.
“Angihlanganisi lutho mina nokuqokwa kosonkontileka. Lukhona uhlaka emkhandlwini olwenza lowo msebenzi,” kusho uNgubane.
Okhulumela uMnyango wezokuBusa ngokuBambisana neziNdaba zoMdabu KwaZulu-Natal uMnuz Lennox Mabaso uthe bebengenalo ulwazi ngokuthi uNgubane ubuye abe nguthishanhloko.
UMabaso uthe akukho emthethweni ukuthi ikhansela eliqashwe ngokugcwele liphinde lenze umunye umsebenzi.
“Izimeya eziningi zisebenza ngokugcwele. Akukwazi ukuthi zenze eminye imisebenzi ngoba kusho ukuthi kukhona umsebenzi ezingeke zikwazi ukuwenza kahle,” kusho uMabaso.
Uthe bazoyiphenya indaba kaNgubane uma bethola ukuthi lezi zinsolo ziyiqiniso bazothatha izinyathelo.
UMabaso uthe lolu daba bazophinde balubheke noMnyango wezeMfundo lapho uNgubane eqashwe khona ukuba nguthishanhloko.
Ngokuthola kweSolezwe ngemithombo yalo esondelene noNgubane, uchitha isikhathi esiningi esikoleni lapho enguthishanhloko khona.
“Onogada bakhe uhlala nabo ngisho esikoleni,” kusho umthombo.
UNgubane akusilo ikhansela lokuqala le-IFP elenza imisebenzi emibili njengoba likhona naseMkhandlwini waseZululand, eliyimenenja enkampanini yabangcwabi oLundi.