Kutholwe isidumbu sesalukazi emfuleni sinqunywe intamo
USASHAQEKILE umndeni wesalukazi (70) saseMbongolwane isidumbu saso esitholwe emfuleni uThukela sinqunywe intamo.
Umndeni kaNkk Shiyakulenga Ntuli waseMbongolwane usadidekile ngokutholakala kwesidumbu sakhe sinqunywe intamo, sinanenxeba lokugwazwa entanyeni.
Umakoti wakwakhe, uNksz Thembisile Nxumalo obehlala naye egcekeni uthe ugcine ukumbona ngeSonto ntambama. “NgoMsombuluko ekuseni ngididekile ngingamboni ngabuza indodakazi yakhe ukuthi beyingakamboni yini, nayo yathi ayikamboni. Yathi icabanga ukuthi uye kubo kwaButhelezi lapho bekushone khona ingane kamfowabo,” kuchaza uNksz Nxumalo.
Uthe uNkk Ntuli wayengababikelanga ukuthi uzovukela kubo kodwa basole ukuthi uye khona ngoba akazange alithole ithuba lokuya emngcwabeni ngeSonto.
Bafonele kwaButhelezi bezama ukuthola ukuthi ufikile yini kodwa bangathola muntu.
UNksz Nxumalo uthe ngawo uMsombuluko emuva kwehora leshumi bezwe ukuthi kunomuntu otholakale entanta emfuleni uThukela.
Uthe bebengazitsheli ukuthi nguye kodwa baba novalo lokuthi kungaba nguye ngoba bebengamtholi ndawo.
Ngokusho kwakhe bafike isidumbu singakakhishwa, balinda namanye amalungu omphakathi.
“Isidumbu sathi uma sikhishwa sathola ukuthi uyena. Asiqondanga ukuthi ungene kanjani emfuleni. Sazibuza ukuthi ngabe uhambe yena wayongena emfuleni. Nalapho besingaqondi ukuthi ubengakwenzelani lokho. Sithe uma sesisekhaya sathola ucingo lusibikela ukuthi isidumbu sakhe besizikiziwe entanyeni futhi sinenxeba lokugwazwa. Kubuhlungu ukuthi abulawe kanjena. Akulula ukuthi sithi kukhona esikusolayo ngoba akukho obekusolisa okwenzekile. Sesizolinda umbiko wokuhlolwa kwesidumbu nophenyo lwamaphoyisa,” kusho uNksz Nxumalo.
Okhulumela amaphoyisa KwaZuluNatal, uLt Col Thulani Zwane, ukuqinisekisile ukuthi amaphoyisa aphenya icala lokubulala emuva kokutholakala kwesidumbu sikaNkk Ntuli.
Uthe isizathu sokubulawa kwakhe asikaziwa.
Khonamanjalo, kutholwe isidumbu sowesifazane oneminyaka elinganiselwa kwengu-30 sintanta emfuleni uMkhomazi izolo ekuseni. Okhulumela abezimo eziphuthumayo kwa-ER24, uMnuz Russel Meiring, uthe bafike kule ndawo ngemuva kokushaya kwehora lesishiyagalombili ekuseni ngemuva kokubikelwa ngamalungu omphakathi ukuthi kukhona isidumbu asibonayo emfuleni.
Uthe lesi sidumbu sikhishiwe emfuleni kwatholakala ukuthi sinamanxeba okulimala ekhanda kodwa akukho abebesengamsiza ngakho ngoba ubeseshonile.