Kunikelelwe abashelwe yimijondolo
BANIKELELWE ngezingubo zokulala nokudla abashelwa yimijondolo ekuForeman Road eSydenham, izolo.
Ilinganiselwa ku-500 imijondolo eyasha emasontweni amabili edlule. Kusolwa ukuthi umlilo wathungelwa yikhandlela elalingacishiwe.
Kulesi sigameko kwashona uNksz Mbali Xulu, uyise wengane yakhe uMnuz Eric Mpanza nengane yabo uSisipho Xulu (2), ababelele emjondolo okusolwa ukuthi umlilo waqala kuwo.
Uphiko olubhekele izinhlekelele kwaCoca Cola Beverages South Africa (CCBSA) nohlaka lwabasebenzi olusiza umphakathi olwaziwa ngokuthi amaSoul Ambassadors bavakashele lo mphakathi osakhoseliswe etendeni.
UMnuz Samkelo Nkosi wezokuxhumana kule nkampani uthe bonke abasebenzi bakule nkampani kumele bachithe usuku olulodwa onyakeni besiza umphakathi.
“AmaSoul Ambassadors azikhethela ukuthi azokwenza okungaphezulu kwalokho okubekwe yinkampani, ngokuhlale ebeke indlebe ngezinhlekelele ezenzekayo emphakathini.
“Lolu hlaka yilona olusazisile ngalesi sigameko, bangagcina ngokubika kuphela kodwa bahlanganisa imali bathenga izinto abacabanga ukuthi zidingwa kakhulu umphakathi.
“U-15% wezinto esizonikela ngazo namhlanje uphuma kubo laba basebenzi,” kusho yena.
UMnuz Mqapheli Bonono onguSihlalo wabaHlali baseMjondolo KwaZuluNatal, uthe babonga kakhulu ngezipho eziphuma kwaCCBSA.
Uxwayise osomathuba abangashelwanga yimijondolo, bangalokothi basondele kulabo abazokwamukela usizo.
“Ngiyazi ukuthi ukwenzeka kwalesi sigameko kuvulele osomathuba abafuna ukuzuza izinto okumele ngabe zitholwa ngabantu abahluphekile.
“Kukaningi ngibikelwa ukuthi kufike abantu abathize banikela ngezinto ezithile kodwa zatholwa ngabantu abangazange bashelwe yimijondolo.
“Kulokhu ngizosebenzisa uhla esinalo lwabashelwe yimijondolo. Abangashelwanga ngicela bangazihluphi,” kusho yena.
UNksz Ntombifuthi Majeke osahleli etendeni ubonge kakhulu ngosizo lwakwaCCBSA wathi ukudla akuthole izolo kuzomlonda isikhashana.