‘Bazojeza abaphula umthetho womgwaqo’
UNGQONGQOSHE wezokuThutha nokuPhepha koMphakathi KwaZulu-Natal, uMnuz Mxolisi Kaunda, uthi kuzobashubela abashayeli abangayilandeli imithetho yomgwaqo kulesi sifundazwe.
UKaunda ukhulume kanje ngemuva kokuboshwa komshayeli wetekisi obehamba ngesivinini sika-143km ngehora esikhundleni sika120 km ngehora oThongathi, izolo.
Umshayeli, obehamba nabagibeli etekisini yakhe, uboshwe ngamaphoyisa asoThongathi emgwaqweni uN2 eduze kwebhuloho lomfula uThongathi.
“Ukuboshwa kwakhe kuzothumela umyalezo ocacile wokuthi ngeke sikubekezelele ukuphulwa kwemithetho yomgwaqo. Ngiyalele wonke amaphoyisa omgwaqo ukuthi abophe iziphulamthetho ngoba sifuna wonke umuntu azi ukuthi iKwaZuluNatal ayidlali neziphulamthetho,” kusho uKaunda.
Uthe ufuna wonke umuntu oza KwaZulu-Natal aphephe ngesikhathi samaholidi kaKhisimusi nangoNcibijane.
“Sicela bonke abantu balandele imithetho yomgwaqo, bahlale beqaphile ukuze bahlenge impilo yabantu. Kufanele siqonde ukuthi ukuphepha emgwaqweni kudinga thina sonke,” kusho uKaunda.
Ubonge amaphoyisa ngomsebenzi wawo omuhle wathi awaqhubeke nawo ukuze kuqedwe izingozi ezenzeka emigwaqweni yaKwaZulu-Natal.
UKaunda uphinde wancoma amaphoyisa nenkantolo ngokuhlawuliswa u-R15 000 koMnuz Linda Myeni owayehamba ngesivinini sika-189km ngehora endaweni ka-120 Km ngehora ngo-Okthoba 2.
“Izephulamthetho zizoboshwa, zivalelwe ejele futhi zigwetshwe kanzima. Siyajabula ukuthi izinkantolo zibajezisa kanzima abaphula umthetho womgwaqo,” kusho uKaunda.