Bagxeka abanyanya ama-dreadlocks okufakelwa
UKUBUKELANA phansi yikho okwenza abantu banyanye ukuxhuma imiyeko egundwe abanye, ekubeni bekwazi ukuthenga izinwele zangempela zaseIndia nase-Brazil.
Lona ngumbono kaBeanko Raja ongomunye wabacwali bezinwele abagxile ebhizinisini lokuxhuma amadreadlocks emigwaqweni yeTheku. URaja ungomunye wabacwali abasebenzela ngaseWorkshop, abadayisa nemiyeko yokufakelwa.
“Ngineminyaka eyisihlanu ngenza lo msebenzi okuyithalente lemvelo. Sisebenzisa inalithi enkulu kuphela ukwenza lesi sitayela, kufana nokukhrosha ijezi,” kusho uRaja othe abangawafuni ama-dreadlcoks angempela agundwe ngabanye, babaxhuma athengwayo. Nokho uthe kuyamangaza ukuthi abantu bayawaqhenyela awangempela ekubeni bezixhuma izinwele zezinye izinhlanga.
URoyal Kush uthe leli bhizinisi lihamba phambili eHarare. Uthe lesi sitayela sibizwa ngamaBongo Dreadlocks ngoba kuba yimiyeko emikhulu kodwa akusona esamaRasta kuphela. “Kuya ngekhasimende ukuthi lifuna isitayela esinjani. Abanye bafika sebeziphathele awabo, abawathenga komunye osegundile. Nathi kuyenzeka sibadayisele esisuke siwathenge kwabanye.”
UKush uthe ngesikhathi lifika leli bhizinisi eThekwini, abantu bebewadayisa nangoR2 000 amadreadlocks abawagundile. Ngenxa yokuthi sebebaningi abenza leli bhizinisi, nabawadayisayo abasabizi kakhulu.
“Ngisho umlungu angawaxhuma ngoba siwathungela ezinweleni. Uma uzoqala, ukhokha uR250 ukuxhuma uma unezinwele zemvelo bese kuba uR300 uma unezilulwe ngemithi.”
UShepard Jobi ukhala ngesikhathi esidleka ngokwenza ikhanda elilodwa kuleli bhizinisi. Ukhombise intatheli iminwe esikekile, athe kwenziwa ukusebenzisa inalithi. Eduze kwalapho asebenzela khona kunetafula elibekwe amaqoqo ama-dreadlcosk agundiwe. Uthe abiza uR 800 ngenxa yobude bawo. Uma umuntu ethole amafishane, uyakwazi nokuthenga amanye awaxhume ukuze abe made. Yize bebaningi asebenza lo msebenzi, uJobi uthe kuya ngesineke nesipiliyoni.
“Uma uthole ongawazi kahle umsebenzi, kuyabonakala. Kubalulekile ukuthi abukeke kahle, ahleleke ukuze kungabukeki kuwubunuku. Lesi sitayela sijwayele ukumataniswa nobunuku ngenxa yokuthi abanye abakwazi ukuwenza kahle umsebenzi.”
Isolezwe lifike kunabesifazane nabesilisa abebezokwenza lesi sitayela, abanye bezovuselela. Labo somabhizinisi bathi balindele ukuthi babe matasa ngamaholide kaKhisimusi.