Imba eqolo imishado yesimanje
KUGUGA iphakethe emishadweni yesimanje okuthiwa osezingeni ubiza u-R120 000 omhlophe kuphela. Njengoba izitayela zifika zedlule ziningi nezinto ezifikile emishadweni ezenza zenyuke nezindleko. UMazwi Zuma, ongumhleli wemishado, uthe abantu balenyusa kakhulu izinga emishadweni emhlophe. Uthe kwebizayo enakho konke okudingekayo kwesimanje, umuntu uchitha imali ephakathi kukaR90 000 noR120 000, kuye ngokuthi ufunani emshadweni wakhe. Uthe kuyenzeka izindleko zibe ngaphezulu kwalokhu.
“Lapha sikhuluma ngomshado omhlophe wosuku olulodwa. Uma abantu bezoshada nowesintu izindleko zingaphezulu njengoba ujwayele ukwenziwa ngosuku lwawo wodwa,” kuchaza uZuma.
Uthe izinto eziphambili ezibizisa umshado kubalwa izimbali athe ziyafika ku-R35 000 ngoba kumele zibe khona yonke indawo yomcimbi. Kulezi zimbali okungezikhiwe engadini kukhona nezakhelwa ebhodini eliba sesiteji lapho kuhlala khona abashadayo. Okunye athe akumele kube yincikinciki yizithombe athe zibiza okungenani uR12 000. UZuma uthe abantu bafuna izithombe ezisezingeni ukuze zibe yisikhumbuzo. Akusafani nakuqala lapho umuntu ayethatha noma ngubani onekhamera.
“Akumele udlalele ngasezithombeni ne-video, yingakho kumele uthole umthwebuli oqeqeshiwe osezingeni. Kumele umcimbi wonke ube sezingeni elicokeme ukuze kubonakale nasezithombeni, nazo ezisezingeni,” kusho uZuma.
Ubale nezihlalo ezibizwa ngamaTiffany athe nazo ziyandisa ezindlekweni zomshado. Uthe azisadlisi izihlalo zepulasitiki ezikhavwa ngezindwangu zokuhlobisa. UZuma uthe ukuqasha izihlalo zeTiffany kuyenzeka kubize phakathi kukaR10 000 noR12 000, kuya ngesibalo sazo. Okunye okuhamba phambili emishadweni yesimanje wukushintsha ngezingubo ezimbili kumakoti. Eyokuqala ngeyokubopha ifindo bese kuba eye-reception.
UZuma uthe naso isigaba somabo sinezindleko ngokwaso njengoba kuqalwa phansi kuqashwe abapheki abakufundele. Emabweni kudingeka amatende esimanje abizwa ngamaStretch Marquee enza kubukeke kahle. Kula matende nakhona kusetshenziswa izihlalo zeTifanny. Abashadayo nezimpelesi zabo kudingeka babe nezingubo zokushintsha ezihambisana nomcimbi wesintu.
Phambilini bekungathi ngosaziwayo kuphela okudingeka bashade imishado esezingeni. Ube sematheni umshado kaMinnie Dlamini noMnuz Quinton Jones abanye abawubize ngomshado wonyaka. Izindleko zalo mshado obuseCape Town zilinganiselwa kuR1 million. Ubukhazikhazi bawo buyabonakala ohlelweni oluthi Being Mrs Jones okuthiwa abakwaMulti Choice badayiselwe amalungelo okulusakaza ngoR6 million.
Ezinkundleni zokuxhumana kusakhulunywa ngomshado kaSerena Williams ongumdlali we-tennis e-United States of America. Umshado wakhe noMnuz Alexis Ohanian kuthiwa udle u-R14 million.
Nakhu okunye okunyusa izindleko zomshado:
*Umviliyelo wezithuthuthu eziqashelwa ukukhipha abashadayo
*Ukuqashwa kwezimoto eziphambili ezithwala umshado.
*Izindandatho osekudlisa kakhulu ezeWhite diamond.
*Ukuqashwa kozophaqula umakoti nezimpelesi.