Ongakwenza uma ingane ibindwa ukudla
SEKUSEDUZE ukuthi kuqale amaholidi, okusho ukuthi iningi lezingane zizobe zihleli emakhaya.
Ukuhilwa wukudla nokubindeka kungezinye zezimo eziyingozi ezinganeni. AbakwaNetcare baxwayisa ngalesi simo. Bathi zikhona izindlela zokunikeza ingane usizo oluphuthumayo ngaphambi kokuthi iyiswe esibhedlela.
UDkt Hennie Smit wakwaNetcare osanda kusiza ingane eneminyaka emibili esibhedlela eKrugersdorp, eGoli uyachaza.
“Ngenhlanhla sikwazile ukususa obekubambe ingane emphinjeni, yaphuma esibhedlela emuva kwezinsuku ezimbili,” kuchaza udokotela. OyiNhloko yeClinical Leaderships uMnuz David Stanton, uthe kubalulekile ukwehlisa umoya uma ingane ibindwa.
“Ukushesha ususe okubinde ingane kuyasiza ekutheni kungabi khona umonakalo omkhulu. Nokho asikukhuthazi ukuthi uphoqe ukususa okubinde ingane uma ungakuboni kahle. Lokhu kungenza umonakalo omkhulu. Ngenxa yeminyaka enye ingane ngeke ikwazi ukukhomba lapho ibambeke khona. Ungabona ngezimpawu zokuthi ingabe isakwazi ukukhwehlela, ishintshe nasebusweni ibe bomvu,” echaza.
Uthe ngaphambi kwanoma yiluphi usizo, kudingeka kushayelwe abezimo eziphuthumayo kuqala. Amasu okusiza ingane ebindiwe: *Yikhuthaze ukuthi izame ukukhwehlela. *Yima noma uguqe ngemuva kwengane bese uyigona ngezandla zombili. Ngesandla esisodwa fingqa isibhakela usibeke ngenhla kwenkaba.
*Beka esinye isandla phezu kwesifingwe isibhakela bese uyayicindezela izikhathi ezimbalwa.
*Bheka emlonyeni ukuthi akukaveli yini okubambe ingane, uma ukubona kudonse ngesineke.
*Eminye imizamo ongayenza ukugobisa ikhanda lengane, uyishaye emhlane izikhathi eziyisihlanu.