Abeseka uRamaphosa ethembeni
ABASEKA iphini likamengameli we-ANC uMnuz Cyril Ramaphosa ukuthi abe ngumengameli wale nhlangano engqungqutheleni engoDisemba bathi ikhona impilo ngemuva kwengqungquthela noma bewina noma bekhala ngaphansi.
UMnuz Sthembiso Mshengu, okhulumela abaseka uRamaphosa KwaZulu-Natal, uthe akusho ukuthi kuzobe sekuphelile ngabo uma behlulwa ngoDisemba.
“Le ngqungquthela ayikhona ukufa nokuphila kodwa impilo iyaqhubeka futhi siyomeseka lowo oyophumelela. Akuliwa sifuna ukubumba i-ANC,” kusho uMshengu.
Uthe okubalulekile ngukuthi i-ANC kumele ibuyelwe ukuthenjwa umphakathi.
Uqhube wathi baxoxa nabo bonke abagaqele esokuba umengameli ukuze kusetshenziswane.
“Siyayichitha nemibiko ebisabalele ngempelasonto yokuthi sike sazama uDkt Dlamini Zuma (Nkosazana) wasichitha. Siyaqhubeka nokuthi sikhulume namalungu siwanxenxa ukuthi aseke uRamaphosa,” kusho uMshengu.
Usho lokhu nje ngempelasonto ivaliwe imihlangano yamagatsha yokuphakamisa abaholi abaya engqungqutheleni eqala ngoDisemba 16 kuya kuDisemba 20 eNasrec, eGoli.
Izifundazwe zizoba nemihlangano ama-Provincial General Council (PGC) lapho kuzoxoxwa khona ngendaba yabaholi bese leso sifundazwe siphuma namagama abaholi abaphakanyisiwe.
Ilapho kuzocaca khona ukuthi yimuphi umholi ohamba phambili ngokwamavoti.
Kodwa lokhu akusho ukuthi uma umholi ephakanyiswe yizifundazwe eziningi nasengqungqutheleni kuzohamba kanjalo ngoba amalungu azovotela abaholi abaphezulu.
Ekhuluma eralini KwaNongoma ngeSonto, uRamaphosa uxwayise ngokuthi amalungu awangamukeli izimvilophu ezinemali njengoba indaba yokuthengwa kwamavoti yinto eyaziwayo ukuthi iyenzeka uma kunezingqungquthela.
URamaphosa uthe amalungu awangagudluki kwakuyalelwe ngamagatsha kodwa afike avote ngendlela athunywe ngayo ngoba amele izinkumbi zamalungu angakwazi ukuya engqunguqutheleni.
Angu-5 200 amalungu azothamela ingqungquthela.