Ingebhe kudutshulwa omunye umuntu eSigodini
UHLALELE ovalweni umphakathi waseSigodini, eMgungundlovu, ngemuva kokudutshulwa kwelungu lomphakathi kwashiswa nendlu yalo ngempelasonto.
Kwenzeka lokhu nje bekukade kudutshulwe umshayeli wetekisi kwashiswa netekisi.
Kuthiwa uMnuz Mduduzi Majola (44), uhlaselwe ngabantu abangaziwa ekubo entathakusa ngoMgqibelo wadutshulwa kaningi maqede bashisa indlu yakhe, bamshiya bezitshela ukuthi ushonile.
NgoLwesihlanu kwadutshulwa umshayeli wetekisi (28) nomsizi wakhe behamba ngetekisi eSigodini kodwa bangalimala.
Kuthiwa bamiswa abasolwa abashisa izihlalo zetekisi base beyabaleka.
Isolezwe lithole ukuthi sekuphenduke insakavukela umchilo wesidwaba ukudutshulwa kwabantu kule ndawo.
Ilungu lomphakathi elithinte Isolezwe lithe lesi simo siyakhathaza.
“Abantu bayabulawa, kushiswa amateku nemizi yabo kodwa akekho umuntu oboshwayo. Sikhathazekile ngalesi simo esiqhubeka kule ndawo. Empeleni sinovalo, umphakathi usuyesaba,” kusho umthombo.
Impi kule ndawo kuthiwa iqalwe wumbango womzila wamatekisi aseSigodini kodwa kubukeka sikhula lesi sihlava.
Okhulumela amaphoyisa KwaZulu-Natal, uCaptain Nqobile Gwala, uziqinisekisile zonke lezi zehlo wathi kuyaphenywa.
“NgoLwesihlanu kudutshulwe umshayeli wetekisi nomsizi wakhe kwashiswa izihlalo zetekisi. Kuvulwe icala lokuzama ukubulala nelokucekela phansi impahla. NgoMgqibelo entathakusa kudutshulwe owesilisa ona-44. Udutshulwe emqaleni, esiswini nasemlenzeni kwashiswa nendlu yakhe. Kuvulwe icala lokuzama ukubulala nelokushisa. Amaphoyisa ayaphenya akekho osaboshiwe,” kusho uGwala.
UMajola akucaci noma ungusomatekisi yini.
Isolezwe lizamile ukumthinta ocingweni lwakhe ngoMsombuluko kodwa beluvaliwe. Imizamo yokuthola umndeni kaMajola ayiphumelelanga.