Kushile kwabasolwa ngokuqola abantu eThekwini
KUBOSHWE amadoda amahlanu asolwa ngokuqola abantu eThekwini. Kuthiwa atholwe nemishini okuthiwa abeyisebenzisela ukuqola abantu imali atholwa namakhadi asebhange, awakwaSassa, amaselula, izitatimende zasebhange nama-payslips.
Okhulumela amaphoyisa KwaZulu-Natal, uCaptain Nqobile Gwala, uthe amadoda aneminyaka ephakathi kuka-26 no 43 abanjwe ngesikhathi kunomkhankaso wamaphoyisa ophiko lweProvincial Tracking Team namaphoyisa kaMasipala weTheku.
UCaptain Gwala uthe amaphoyisa ezwe ukuthi kukhona izigilamkhuba eziqola abantu ngaseMarine Parade, eThekwini anikela khona awafica amadoda.
“Amaphoyisa aphinde ashaqa imoto yabasolwa iLand Rover Discovery yaphindiselwa ebhange ebelibanike imali yokuyikhokhela,” kusho uCaptain Gwala.
Uthe abasolwa bagcinwe ezitokisini zaseDurban Central kanti bazobekwa amacala okukhwabanisa nokutholakala nezinto okusolwa ukuthi ngezokwebiwa.
Bazovela maduze enkantolo kanti kuzobhekwa ukuthi abathinteki yini kwamanye amacala okukhwabanisa aseke enziwa eThekwini nasezindaweni ezakhelene nalo.
UKhomishana wamaphoyisa osabambile KwaZulu-Natal, uMajor General Bheki Langa, uncome amaphoyisa ngokubopha abasolwa nokushaqwa kwezinto ezisetshenziselwa ukukhwabanisa.
“Sizokwenza isiqiniseko sokuthi babhekana nengalo yomthetho senze nohlelo lokuthi bakhonjwe ngabagilwa ukuze bashushiswe ngawo wonke amacala abo,” kusho uLanga.