Likhona ikusasa ngemuva kwama-Idols
IKWAZULU-Natal iphunyukwe yiqatha emlonyeni ngeSonto emncintiswaneni wamaIdols. Amathemba abantu besifundazwe abekuMthokozisi Ndaba waKwaMashu kodwa ogcine engalibonanga elidlalayo entokazini yaseKapa, uPaxton Fielies.
Isifundazwe sivamise ukwenza kahle kakhulu kuma-Idols futhi sihamba phambili uma usiqhathanisa nezinye kulabo aseke badla umhlanganiso nabangena esigabeni sokugcina.
Kulabo singabala uKhaya Mthethwa, osengumsakazi kuMetro FM, Vincent Bones, osanda kukhipha umculo omusha, Noma Khumalo onguthisha futhi osaqhubeka nomculo, Shekhinah abanengoma ngokuhlanganyela noKyle Deutsch, Lloyd Cele osayibambile emculweni, Sphelele Ngcobo okhiphe i-albhamu ngonyaka owedlule nabanye.
UMthokozisi ngelinye lamaqhawe iKZN eziqhenyayo ngawo. Khona kunzima ukwemukela ukwehlulwa kodwa kuningi angakwenza okungaguqula impilo yakhe ifane nekaPaxton. Kunama-Idols adla umhlanganiso kodwa afisa ukufana no-Amanda Black. Uma ufuna azokuculela kudingeka ukhiphe u-R90 000, njengamanje awukho umcimbi omkhulu ongabi naye.
U-Amanda akawinanga kuma-Idols kodwa usebenzisa ikhono lakhe nodumo aluthola kumaIdols. Kuthi akube yinto efanayo noLloyd (Cele) oke wasebenzisa udumo aluthola kuma-Idols ukungena kwiVuma FM abe ngumsakazi.
Udumo uMthokozisi aluthole kuma-Idols lukhulu kakhulu, angenza noma yini anesifiso sokuyenza. Akungamdini ukwehlulwa ngoba lokho kungacekela phansi ikusasa lakhe. Kuyathusa ukuthi akafuni ukukhuluma namuntu ngemuva kwemiphumela, kusukela ngeSonto kuthiwa uvele wavala ucingo lwakhe, wakhetha ukuyozihlalela yedwa. Kodwa kuyancomeka ukuthi ithimba lama-Idols lithembise ukuthi lizomsiza ngokumyisa kubefundisi nakubeluleki bengqondo ukuze amukele isimo, aphinde akhumbule ukuthi emncintiswaneni kuba khona ohlulwayo nophumelelayo. Kuzomele akhumbule ukuthi ngesizini edlule uThami Shobede waseMtubatuba waphuma isibili ehlulwa nguNoma kodwa akalilahlanga ithemba, usanda kukhipha i-albhamu ngokusizwa abama-Idols. Likhona ikusasa ngemuva kwanoma yimuphi umncintiswano.