UPitso akayeke ukuzenza ngcono kunabanye abaqeqeshi
MHLELI: Ngiyavumelana noMshengu waseMnambithi uma ethi umqeqeshi nomqeqeshi unezindlela zakhe zokudlala.
Kungani uPitso Mosimane (osesithombeni) njalo ekhala ngezindlela okudlalisa ngazo abanye abaqeqeshi ngoba phela nabo bahlela ngendlela yabo evikela imisebenzi emaqenjini abawaholayo? UPitso uhlala encoma iBhakabhaka ethi kumnandi ukudlala nalo ngoba lidlala njengabo ngoba usuke azi ukuthi uzozigwazela ibhece kulona.
Ibhola lidlalwa ngomqondo kubaqeqeshi futhi uma bepaka ibhasi kungani yena engakhombisi ukuthi uwumqeqeshi onamaqhinga okwaziyo ukugudluza ibhasi elipakiwe? Kufanele ngabe unawo amaqhinga ngoba uyazi ukuthi bapaka ibhasi bonke ngaphandle kwePirates lena ayichomelayo .
UPitso usifaka ehlathini ufuna sizonde abaqeqeshi bamaqembu ethu bese ebabhuqa ethi nakuye kwakunje ukuze bangaxoshwa yena uziqophela umlando ngabo. Naka iqembu lakho ndoda ududule ibhasi elipakwe endleleni yakho kunokuthi usidukise. Ngabe namanje awukakwazi ukuthi umnqoba kanjani opake ibhasi? Ngikuthandile okushiwo uSteve Komphela uma ethi bayasidukisa ngoba ziningi izindlela zokudlala ibhola futhi nemiqondo nezinhloso zabaqeqeshi azifani. Uma ngiwumqeqeshi kunani pho mengifaka abayisithupha emuva ngoba ngiyazi ngizohlasela kanjani uma sengihlasela.
Ngicela uPitso afunde Isolezwe langoLwesibili mhlaka-7 kuNovemba ukuze naye afunde amazwibela esimanje manje okubophela isikimu. Iphepha uzolithenga ngemali encanyana nje engamarandi amathathu nosheleni abayisishiyagalombili kuphela. Akalithenge ukuze athole isifundo samahhala.. Scathulo Thusi MTUBATUBA