Kuxwayiswa abakhipha imali
INHLANGANO ebhekele ukuphepha kwabantu abakhipha imali emabhange iSouth African Banking and Risk Information Centre (Sabric) icele abantu ukuthi baqaphele uma bekhipha imali njengoba sekusondele isiphithiphithi sikaDisemba.
Isikhulu esiphezulu sakwaSabric, uNkk Kalyani Pillay sithe abantu kufanele baqaphele ngoba izigebengu ziphume ngobuningi bazo kulesi sikhathi ukuze zibaqole amabhonasi abo.
“Sicela abantu baqaphele ngoba izigebengu ziza namasu amasha okubaqola emabhange. Ukulahla ikhadi kunyusa amathuba okuqolwa. Ungalwamukeli usizo kubantu ongabazi kumaATM. Izigebengu zenza sengathi ziyakusiza kanti sezitshintsha ikhadi lakho kwi-ATM bese zikuqola,” kusho uNkk Pillay.
Uthe kufanele abantu behlise nemali abayikhipha ngosuku kuma-akhawunti abo ngoba uma amaqola esethole imininingwane yabo ayikhipha yonke imali.
Kwabasebenzisa i-internet uma bebhanga uthe kuyingozi ngoba imininingwane iyantshontshwa.
“Sicela abantu bagcine kahle imininingwane yabo eyimfihlo futhi bangayiniki noma ngubani. Imininingwane eyimfihlo iba kumazisi, kwilayisensi, i-passport, izincwadi zikagesi nezasezitolo. Siyacela bangalokothi bazibhale phansi izinombolo eziyimfihlo zasebhange,” kusho uNksz Pillay.
Uveze amasu ambalwa athe azogcina abantu bephephile
Qiniseka ukuthi imininingwane eyimfihlo uyinika abantu abafanele ungayikhiphi ocingweni kubantu ongabazi.
Ungalokotho ukhiphe inombolo eyimfihlo oyisebenzisela ukukhipha imali ebhange.
Ungafaki amaphepha anemininingwane yakho eyimfihlo esikhwameni osisebenzisa nsuku zonke.
Uma usebenzisa i-WiFi ukubhanga yazi ukuthi imininingwane yakho ayiphephile, ikakhulukazi uma kuyi-Wi-Fi yamahhala.
Shintsha ama-password okungena kwi-akhawunti yakho yakwi-internet. Uma usebenzisa i-ATM :
Ungayi kwegcwele isixuku noma enabantu abazulazula eduze kwayo.
Ungalokothi unikeze izingane ikhadi lakho ukuthi ziyokukhiphela imali, izigebengu zizibamba kalula izingane.
Uma ucabanga ukuthi i-ATM oyisebenzisayo ayisebenzi noma isigwinye ikhadi lakho likhansele bese ulibika ebhange ukuze balivale.
Ungawasebenzisi ama-ATM ongawajwayele.
Ulandele imiyalelo eshiwo kwi-ATM mayelana nokukhipha imali, ufake inombolo eyimfihlo uma usuceliwe ukuthi yenza njalo.
Bika okusolisayo ngokushayela inombolo ebhalwe kwi-ATM.
Kufanele uyazi kahle i-ATM ukuze ubone uma kufakwe imishini yokuqola abantu.
Ungalokothi ufake ikhadi lakho ngenkani kwi-ATM okubonakalayo ukuthi kukhona abebezama ukuyigqekeza
Abezitokofela banikwe lawa masu:
Yekani ukufaka imali eniyiholile ekupheleni kwenyanga ngoba kusuke kuphithiza ngalezi zinsuku.
Qinisekisani ukuthi oyofaka imali akahambi yedwa kodwa uhamba namanye amalungu estokfela.
Ningawacela amalungu ukuthi afake imali ebhange njalo ngenyanga kunokuthi niyoshiya ukheshi esitokofeleni njalo uma kuphela inyanga.
-Uma senihlukanisa imali qinisekani ukuthi ingena kwiakhawunti yamalungu enu hhayi ukuthi nikhiphe ukheshi bese nihamba nawo nithi niyowuhlukanisa kwenye indawo.