U-Ertugral uyeke ithuba lokuyocija oweBafana
MINENHLE MKHIZE UQWEQWE lomqeqeshi uMuhsin Ertugral luyeke ithuba lokusebenza nomgadli weBafana Bafana uLebogang Manyama.
U-Ertugral kuke kwaba namahlebezi athi ufunwa yiKonyaspor edlalelwa nguManyama. Lo mgadli oqokwe waba ngumdllali ovelele kwi-Absa Premiership ngesizini edlule ufike kuleli qembu ekuqaleni kwesizini. U-Ertugral nguyena owaveza uManyama ebholeni elikhokhelayo ngesikhathi esacija i-Ajax Cape Town.
Ethintwa yileli phephandaba uvumile ukuthi uke waba nezingxoxo naleli qembu eligijima kwiligi enkulu yaseTurkey.
“Yebo ngike ngaxoxa neKonyaspor. Sicishe savumelana kodwa kwaba khona izinto ebe nginganeme ngazo. Phakathi kwazo, yindaba yokutshelwa yizikhulu ukuthi kuzomele ngizenze kanjani izinto eziphathelene nokudlala kweqembu. Yingakho ngithathe isinqumo sokungawuthathi lowo msebenzi. Angibalekiswanga wukuthi iqembu limi kabi kwi-log. Ngikholwa wukuthi baneqembu elingakwazi ukuvika izembe. Njengamanje nginesicelo seqembu eliseSaudi Arabia. Ngisadla amathambo engqondo ngaso,” kusho u-Ertugral.
IKonyasporMihUlHeSziINenEdRaTwUeGnRi ka-15 kwi-log yeTurkish Super League. Ilengela engozini yokugawulwa yizembe.
U-Ertugral akanalo iqembu aliqeqeshayo njengamanje. Uphuthwe yithuba lokucija iqembu elidlala kwiChampionship yase-England ekuqaleni kwesizini kulandela ukubambezeleka kokuthola kwakhe amaphepha okusebenza kwelamaNgisi.
ENingizimu Afrika ugcine ukubonakala kwiPirates ngesizini edlule. Wesula ngemuva kokubhudluzwa yiSuperport United ngo 6-1 emdlalweni we-Absa Premiership.
“Lapha eNingizimu Afrika alikho iqembu eselike langithinta. Nami angijahile ukubuyela ekuqeqesheni, yingakho ngifuna ukuthatha umsebenzi ongifanele.
Okwamanje ngisebenzela isiteshi sethelevishini eTurkey lapho ngihlaziya khona imidlalo ye-Uefa Champions League. Ngaphandle kwalokho ngiphinde ngisebenze ekomitini labaqeqeshi beFifa,” kusho u-Ertugral.