BAZOBA BOMVU YIMALI KWISASOL NATIONAL CHAMPS
INKAMPANI ezinikele ekuxhaseni ibhola labesifazane eNingizimu Afrika, iSasol, iphinde yavula amaphekethe ayo yenyusa imali eyifake kwiSasol League National Championship njengoba ompetha sebezohlomula ngoR200 000 kusuka kuR50 000 obutholwa yiqembu elidle umhlanganiso.
Umqhudelwano walo nyaka uzokuba seKabokweni eMpumalanga ngoDisemba 4 kuya kuDisemba 9.
Kusuke kuhlangene ompetha abayisishiyagalolunye bezifundazwe.
ISasol inyusa imali yeNational Championship nje, isanda kwenza okufanayo eqenjini lesizwe iBanyana Banyana ngokuvuselela inkontileka ngeminyaka emine.
Laba baxhasi baphinde benyusa imali yomdlali ovelele kwiBanyana kwaba ngu-R10 000.
Emidlalweni yaseMpumalanga abadlali abazovelela bazogoduka behleka bodwa njengoba abaqokwe njengeDiski Queen of the Tournament, umshayi magoli ovelele, umdlali othembisayo bonke bezogoduka nesheke likaR5 000 ngamunye.
Umdlali wosuku uzothola uR2 000.
“Umdlalo wabesifazane uya ngokudlondlobala kule minyaka eyisishiyagalombili, njengenkampani ethanda ukulifukula bekumele sibahlomulise ngalokhu esikubonayo. Sifisela inhlanhla wonke amaqembu azobe eyibambe eMpumalanga. Alikho ithuba elidlula leli lokuveza ithalente ethimbeni labaqoki beBanyana Banyana,” kusho uNozipho Mbatha oyinhloko yezokuKhangisa kwaSasol.
UMbatha ubekhuluma izolo ngesikhathi kuqhathwa amaqembu azodlala.
ISunflower FC izomela iKwaZulu-Natal, Coal City Wizards (Mpumalanga), Bloemfontein Celtic (Free State), Thunderbirds Ladies (Eastern Cape), Kanatla Ladies/Ma-Indies (Limpopo), De’Scorpion FC (North West), RC Millis (Northern Cape), Cape Town Roses (Western Cape) neSundowns (Gauteng).
UPotshoza usishayela ihlombe isenzo sabakwaSasol, sengathi nezinye izinkampani zingabonela kubona ziphonse esivivaneni ukukhulisa lo mdlalo nakwabesifazane.