Uphumele obala ngesinqumo sakhe sokugabha amaqembu amakhulu
UPHUMELE obala ngesinqumo sakhe sokugabha amaqembu amakhulu uJabulani Shongwe ogcine ejoyine iLamontville Golden Arrows ngemuva kokumataniswa namaqembu okubalwa kuwona iKaizer Chiefs ne-Orlando Pirates.
UShongwe (osesithombeni) ubekhonjwa kwiChiefs nePirates ngaphambi kokuthi asayine kuBafana Bes’thende. Selokhu efikile uyazitamuzela ngejezi.
Exoxa naleli phephandaba ngesinqumo sakhe sokujoyina Abafana Bes’thende ukubeke kwacaca ukuthi ibhola elidlalwa yileli qembu yilona elenze wangananaza ukuthi asayine.
“Ngijabule ngokujoyina i-Arrows. Okwamanje ngisazama ukubuyela esimeni njengoba kade ngingadlali. Isifiso sami wukwenza kahle emidlalweni ezayo. Kube yisinqumo esilula ukujoyina i-Arrows ngoba idlala uhlobo lwebhola elihambisana sami.
“I-Arrows ifuna ukuzuza izinto ezinkulu nami ngifuna ukuba yingxenye yokuzuza lezo zinto.
“Usihlalo weqembu (uMato Madlala) ungichazelile ngezinhlelo ezinkulu iqembu elinazo ngase ngithatheka,” kusho uShongwe.
UShongwe oyibamba phakathi nesitayela nenkundla noma ngakwesokunxele phambili uphinde wavula isifuba ngobunzima abhekane nabo kwiBidvest Wits abegijima kuyona ngesizini edlule. Leli nxele lichithe cishe isizini yonke lishikisha ibhentshi ngesizini edlule. “Bekuyisimo esinzima ebengibhekene naso. Kuyacasula uma ungumdlali ukuvele uhlaliswe ebhentshini ekubeni ngesizini eyandulela leyo bengidlala njalo. Ngesizini edlule angizange ngidlale nhlobo. Yize kusuke kucasula ukuvele uhlaliswe ebhentshini kodwa kumqoka ukuthi uzithobe uphinde uziphathe kahle. Kumele wazi ukuthi yini oyifunayo. “Ngizitholile izizathu zokungadlaliswa kwami. Iqembu belenza kahle kodwa njengomdlali uvele ungaqondi ukuthi kungani ungadlali ekubeni wenze kahle ngesizini ephambili.
“Kumele ngiqine ngokomqondo. Ekupheleni kosuku ngilapha kwi-Arrows futhi angisenalo ixhala lokubhekana nesimo ebengibhekene naso ngesizini edlule,” kusho uShongwe.
Izolo i-Arrows ibibhekene ne-Orlando Pirates e-Orlando Stadium, eSoweto, emdlalweni we-Absa Premiership.
UShongwe uthe ujabule ngendlela iqembu elenza ngayo selokhu kuqala isizini kodwa akumele baxegisa ngoba bangazithola beshona phansi kwilog ye-Absa Premiership njengoba kwenzekile ngesizini edlule.
“Kumele sibhekise amakhanda phansi siqhubeke nokusebenza ngokuzikhandla,” kuphetha uShongwe.