Akanendaba nokuhlekwa ohlulwe ngomzuliswano wokuqala
AKAKUGQIZI qakala ukuphendulwa ihlaya umshayisibhakela waKwaZulu-Natal, uSiboniso “Tiger” Gonya, ohlulwe ngomzuliswano wokuqala empini yebhande lomhlaba phesheya kwezilwandle ngempelasonto edlule.
UGonya uhlulwe ngomngqimuzo womlalisa phansi ngumpetha we-World Boxing Organisation (WBO) bantamweight, uZolani “Last Born” Tete, wase-East London empini ethathe imizuzwana engu-11.
Le mpi iyona esiphethe irekhodi elisha lomhlaba lezisheshe zaphela kwezezicoco.
UGonya waseMtubatuba, ophethe ibhande le-WBO InterContintental nele-WBA Pan African, kudingeke anyangwe ngodokotela ngokushesha eringini emuva kokuwiswa yisibhakela sesokudla sikaTete obesaphonsa esokuqala kule mpi. Kusukela emuva kwempi, kukhona asebemphendule ihlaya ezinkundleni zokuxhumana nasemisakazweni.
“Anginandaba nabakhuluma abakuthandayo ngami. Ukufika kwami ezingeni lomhlaba kusho okuthize. Maningi amabhokisa asezingeni eliphezulu eNingizimu Afrika kodwa angakaze afike kuleli zinga, amanye agcine esiyekile isibhakela.
“Ukuhlekisa ngami akungiphathi kabi ngoba kungenzeka ukuthi labo abenza lokho abakaze bafike ezingeni lomhlaba,” kusho uGonya.
“Ukuhlulwa kwami kungifundisile ukuthi sengikwelinye izinga. Njengoba ngijwayele ukuwina kufanele ngikulindele ukuhlulwa. Isihlahla ngaphambi kokuthi siye phezulu kufanele sifake phansi izimpande zaso.
“Ukuhlulwa kwami kusho izinto ezinkulu engisazozithola. Kade ngiphatheke kabi emuva kwempi kodwa ngakhuluma noNgqongqoshe weZemidlalo wase-Eastern Cape (Pemmy Majodina) nosihlalo weBSA (Ntambi Ravele), nokungenze ngamukele konke.”
Esithangamini nabezindaba ngoLwesibili uphromotha kaGonya, uThulani Magudulela, weLudonga Boxing Promotions nomqeqeshi wakhe uZwi Magudulela balandise konke ngohambo lwabo. Bobabili bavumile ukuthi ababonanga uGonya eshayeka kwazise babesazama ukuhlala phansi.
UGonya utshele leli phephandaba izolo ukuthi akakhumbuli ukuthi kwenzekani.
“Ngagcina ngikade ngikhuluma noZwi ngisekhoneni. Emuva kwalokho angazi kwenzekani. Ngikhumbula sengiphansi, ngibuza kuyena ukuthi kwenzekeni.
“Naye wangitshela ukuthi akabonanga kodwa utshelwe nguTete ukuthi ngiwile emuva kokushaywa yisibhakela sesokudla,” kusho uGonya.
“Bengiqala ukuwa selokhu ngaqala isibhakela, kusukela ngisalwa esigabeni samaamesha. Ngiyibukile i-video yempi. Engikwenzile yilokhu esasivele sikuhlelile ukuthi sizoyisa kuyena impi zisuka.
“Bekuzothi emuva kwemizuliswano eyisikhombisa bese siyehlisa isivinini. Ngiyambongela uTete. Engikufisayo manje ukusheshe ngibuyele eringini ukuze ngizoshesha ukukhohlwa ngokwenzekile.”
UThulani, obonakale kwithelevishini ebhunga okuthize noTete, uthe: “Sizama ukuthi uGonya asheshe abuyele eringini. Kufanele athole impi elula ngoMashi ukuze ezobuyelwa wukuzethemba. Inhliziyo yami ibuhlungu ngokuhlulwa kukaGonya.”