Kungase kuxoshwe abeMaritzburg
IBHANTSHI lingase ligcwale umoya kubadlali ababili beMaritzburg United ababhekene namacala ahlukene kuleli qembu elidonsa kanzima kwi-Absa Premiership.
Isolezwe lihabule ukuthi uDevon Saal noLiam Youlley wase-Australia abasayine kwiTeam of Choice ekuqaleni kwesizini, kungase kunqanyulwe izinkontileka zabo. USaal kuvele ukuthi uchaphe ngenhlamba umqeqeshi uFadlu Davids emuva kokuthi emshiye ngaphandle eqenjini labadlali abangu-18 abebezobhekana neBidvest Wits emdlalweni wePremiership eHarry Gwala Stadium emasontweni edlule.
Kulo mdlalo iTeam of Choice ibambane neZitshudeni ngo 0-0. USaal kuthiwa usevelile ekomitini eliqondisa izigwegwe leMaritzburg kodwa isinqumo asikathathwa ngaye. Umthombo weSolezwe ozazi zonke ezeMaritzburg upotshoze ukuthi uDavids uyafunga uyagomela ukuthi ufuna ukwenza isibonelo ngaye uSaal.
UYoulley, owukudla kwebhentshi kwiTeam of Choice, kuthiwa utheleke ejimini edle amanzi amponjwana ekuqaleni kwesonto. Usazobhekana nekomiti eliqondisa izigwegwe. “USaal wacikwa wukuthi akekho kubadlali abangu-18 abebezodlala koweWits. Ugcine exabana nomqeqeshi, wamthuka. Usevelile ekomitini eliqondisa izigwegwe kodwa asikathathwa isinqumo. Umqeqeshi uthe ufuna ukwenza isibonelo ngaye. Kumanje akaziqeqeshi neqembu,” kusho umthombo othe: “ULiam yena kutholakale ukuthi uphuzile ngesikhathi iqembu liziqeqesha ngosuku olwandulela olwayizolo (ngeSonto). Sonke sibhekile ukuthi uzokwenziwa njani ngoba baningi abadlali abamnyama abaxoshiwe ngenxa yecala elifanayo. Usihlalo ubebhokela abashayeli ngokuthi bathule bathini abadlali befika bephuzile.”
Imenenja yeMaritzburg, uQuinton Jettoo, izihlangulile kulolu daba.
Usihlalo weTeam of Choice, uFarook Kadodia uthe indaba kaSaal noDavids isiwumlando.
“Akusezona izindaba lokho manje. Mina ngibheke ukuthi ungibuze ngendaba yesinqumo esisithathile ngaye. Uma sesinqumile ukuthi kuzokwenzekani ngaye sizonazisa. Mayelana noYoulley, angazi ukuthi ubani lona okuthululela izindaba ezingaka. Ngicela uphindele kuyena akutshele,” kusho uKadodia.
ITeam of Choice idonsa kanzima kule sizini kwazise awaqoqeki amaphuzu. Ngesikhathi kuqala isizini izikhulu zibeke ithemba lazo kuDavids emuva kokuthi efake leli qembu kwi-Top 8 ekupheleni kwedlule ka-2016/2017. Nokho ubhekene nobunzima kusukela kuqale eka-2017/2018.