Kulindelwe izingoma ezashisa izikhotha kuBrandy noBrian McKnight
KULINDELEKE ukuthi zitheleke namhlanje izihlabani zomculo zaphesheya okulindeleke ukuthi zinandise emadolobheni amakhulu akuleli.
UBrandy noBrian McKnight kulindeleke ukuthi banandise eGoli, eThekwini naseKapa.
Ngaphambi kokuthi bavakashele la madolobha bazoqala ngokunandisa ePitoli, eSun Arena, Time Square ngoMgqibelo, kulandele amadolobha amakhulu.
UDionne Domyan-Mudie weBig Concert okuyibo abahlela umcimbi, uthe konke sekumi ngomumo. “Siyathemba abantu bazobajabulela laba baculi futhi lena indlela yokubafisela uKhisimusi omuhle,” kuchaza uDionne.
Kuzobe sekulandela umcimbi ozoba seGoli ngeSonto, eTicketpro Dome.
NgoLwesibili bazobe sebedlulela eKapa lapho bezonandisa khona eGrand Arena.
Umcimbi wabo bazowuvala eThekwini ngoLwesine, Disemba 14, lapho bezocula khona e-Inkosi Albert Luthuli Convention Centre (ICC).
Bobabili ezinkundleni zokuxhumana i-Instagram bafake ama-video, bechaza indlela abajabule ngayo ngokuza kuleli.
Baveza ukuthi sebekulindele ngabomvu ukutheleka kuleli futhi bayathemba ukuthi nabalandeli bazoya emicimbini yabo.
UBrandy kulindeleke ukuthi aculele abazobe behambele lo mcimbi izingoma okukhona kuzo iFull Boy’s Mine nezinye.
UBrian yena kulindeleke ukuthi acule okukhona kuzo ethi Still, One Last Cry, Back at One nezinye. Amathikithi aqala kuR480 elokugcina linguR1 000. Moon,