I-Listeriosis iyingozi kwabantekenteke
IZIGULI ezinezifo eziholela ekutheni amasosha omzimba abe ntekenteke kunamathuba amaningi okuthi zingenwe yisifo okukholakala ukuthi sitholakala ekudleni, iListeriosis.
Lesi sifo okuthiwa sesibulale abantu abangu-36 kuleli, singangena kunoma ubani kodwa izingane, abantu abadala, abesifazane abakhulelwe, iziguli ezinezifo eziholela ekutheni amasosha omzimba abe ntekenteke ezifana nesifo sikashukela, umdlavuza, igciwane lengculazi nesifo sezibindi nesezinso kunamathuba amaningi okuthi basithole.
UMnuz Foster Mohale woMnyango wezeMpilo kuleli uthe lesi sifo sitholakala emhlabathini, emanzini nasezitshalweni. Imikhiqizo yenyama neyobisi, izithelo nemifino uthe kungenzeka zibe naleli gciwane.
NgoLwesibili, uNgqongqoshe woMnyango wezeMpilo kuleli, uDkt Aaron Motsoaledi uthe bangu-557 abantu abahlolelwe lesi sifo phakathi kukaJanuwari kuya kuNovemba.
Izimpawu zalesi sifo kubalwa umkhuhlane, imfiva, ubuhlungu bomzimba, ukuphalaza nokuzizwa ukhathele, ukuphazamiseka emqondweni nokunye.
Uphiko oluqaphe ukubheduka kwezifo emnyangweni wezempilo, iMultisectoral National Outbreak Response Team (MNORT) lubikelwe ngokwanda kwemibiko ngalesi sifo kuleli ngo-Okthoba.
Ukudla kungangenwa yileli gciwane ngesikhathi kusasepulazini, ngesikhathi kushintshwa umkhiziqo kwenziwa omunye (food proccessing) ezitolo noma ngesikhathi kulungiswa ekhaya.
UMohale uthe izikhungo ezikhiqiza imikhiqizo yezolimo yenyama neyobisi nomkhandlu wokudla kuleli bacelwe ukuthi balethe imibiko yazo yokuhlola leli gciwane emikhiqizweni yazo.
Njengoba kusacutshungulwa ulwazi oluzoveza ukuthi ngabe yimiphi imikhiqizo ebinalesi sifo, inhlangano yezempilo iWorld Health Organisation (WHO), iluleke umphakathi ukuthi uqaphele indlela ophatha ngayo ukudla.
Phakathi kwezinto okuthiwa umphakathi kumele uzenze ukunciphisa amathuba okungenwa yilesi sifo, kubalwa ukugeza izindla ngaphambi nangemuva kokudla.
Ukuqaphela ukuthi uma kade uphethe ukudla okungaphekiwe awukuthinti ukudla okuphekiwe, ungazigezile izandla.
Gwema ukudla okuphekwe kwangavuthwa kahle, ikakhulukazi inyama . Ukudla okungaphekwa kumele kugezisiswe ngaphambi kokuthi ukudle.
Ukudla okudliwa kushisa kumele kudliwe kushisa kungalindwa kuze kubande.