Bafuna imeya icacise ngoKhisimusi wabadala
I-DA inxusa iMeya yoMkhandlu weTheku, uNkk Zandile Gumede ukuba iphumele obala icacise ukuthi inabo yini ubuhlobo nenkampani enikwe ithenda yokusingatha imicimbi yoKhisimusi babantu abadala eThekwini.
Ikhansela leDA uNksz Sharon Hoosen lithe bayasola ukuthi uNkk Gumede noma iqembu lakhe kukhona abakuhlomulayo enkampanini enikwe ithenda, iSilo Group Holdings.
UNksz Hoosen uthe nangonyaka odlule uKhisimusi wabantu abadala ubukhungethwe yizinkinga, wengeza ngokuthi kulo nyaka izinkinga sezinkulu kakhulu.
“Lezi zinxushunxushu ezenzeka emicimbini yoKhisimusi bogogo ziyawuphoxa uMkhandlu weTheku kodwa akukho ukugxeka esikuzwayo okuvela kwiMeya,” kusho uNkk Hoosen.
Uthe uma umkhandlu uhluleka ukwenza oKhisimusi babantu abadala, ungakwazi kanjani ukwenza umsebenzi kahulumeni.
“Ngabe wenza into enhle Mam Meya uma ungasula esikhundleni sakho ngoba uyakuhlula umsebenzi,” kusho uNkk Hoosen.
Uthe ngisho umyalelo wenkantolo uyakuveza ukuthi kukhona okungazange kuhambe kahle mayelana nokukhishwa kwale thenda.
“Uma ufunda umyalelo wenkantolo kuyacaca ukuthi le thenda kwakuvele kuhlelelwe ukuthi inikwe iSilo Group Holdings?” kusho uNkk Hoosen.
Uthe nendlela okukhishwa ngayo amathikithi iyakhalisa.
Uthe bathole ukuthi le nkampani ayibaniki zonke izipho ogogo.
Isolezwe lihlale lithola izikhalo kubantu abadala, abanye bekhala ngokuthi bashiywa ngaphandle emicimbini yabo.
Kuleli sonto bekukhala abantu abadala base-ward 58, besola ikhansela labo ngokubakhipha inyumbazane.
Isolezwe like labika ngezikhalo zabantu abadala base-ward 103, nabo abebekhala ngokuthi bashiywe ngaphandle banganikwa amathikithi.
Okhulumela uNkk Gumede, uMnuz Mthunzi Gumede uthe iMeya ayihlangani nokukhishwa kwamathenda, akazi ukuthi iDA izisuselaphi lezi zinsolo.
UGumede uthe uhlelo loKhisimusi wabantu abadala luyaqhubeka yize zikhona izinkinga ezibikwayo ezindaweni ezithile.