Baxoshwe bezokwethula izikhalo zabo
ATHWALE kanzima amaphoyisa oMkhandlu weTheku ngesikhathi evimba iqulu lamalungu ezinhlangano ezehlukene zomphakathi ebelifuna ukungena ngenkani emhlanganweni wamakhansela e-ICC izolo lifuna ukwethula izikhalo zalo.
Abantu abebengaphezulu kuka-200 baqale babuthana ngaphandle kwase-ICC lapho bekunomhlangano wamakhansela khona lagcina selingena ngaphakathi.
Amaphoyisa aphoqeleke ukuba abaxoshe sebefuna ukungena ngaphakathi egunjini obekuqhubeka kulona umhlangano.
“Ngenxa yokuthi anisaziphethe kahle sesiyaphoqeleka ukuthi sinixoshe,” kusho iphoyisa lomkhandlu ebelixoxa namalungu ezinhlangano okubalwa kuzona Abahlali baseMjondolo, Active Citizens Movement (ACM), Right2Know nezinye.
UMnuz Ben Madokwe we-ACM uthe abaneme ngesinyathelo somkhandlu sokubuyekeza imithetho ethile yedolobha okubalwa nokuvinjwa kwamalungu omphakathi nabezindaba emihlanganweni ethile kamasipala. UMadokwe uthe bafuna uhoxiswe lo mthetho.
Uthe umthetho uzokwenza ukuthi umkhandlu kube yiwona onqumayo ukuthi yiziphi izindaba okumele zaziwe ngamalungu omphakathi.
Emhlanganweni wamakhansela izolo umkhandlu uthathe isinqumo sokuthi uyiphasise imithetho ethile elawula idolobha okubalwa kuyo novimba amalungu omphakathi nabezindaba ukuthi babe semihlanganweni ethile.
Omunye umthetho ophasisiwe ogunyaza uSomlomo ukuba abe namandla okuthatha izinqumo uma kwenzeke isimo ebesingalindelekile esidinga ukusukunyelwa ngokushesha.
Kuphinde kwaphasiswa nomthetho onika uSomlomo amandla okuthi amkhiphe umuntu ongaziphethe kahle emhlanganweni.
Amakhansela eDA, okubalwa noMnuz Heinz de Boer noNksz Nicole Graham, ahluleke ancama izolo ezama ukucela uSomlomo, uMnuz William Mapena, ukuba avumele abebebhikisha bangeniswe emhlanganweni.
“Le nto eyenzekayo ayikho kuMthethosisekelo. Laba bantu banelungelo lokuthi bangene ngaphakathi emhlanganweni kodwa niyabanqabela,” kusho uNksz Graham.
Uthe iDA izolwa kuze kufike ekugcineni ukwenza ukuqinisekisa ukuthi umthetho uyahoxiswa.
UMapena uthe bayaliqonda ilungelo lababhikishi wathi kodwa abakwazi ukubavumela ukuthi bangene ngoba indawo ayisekho.
“Awukwazi ukungenisa abantu abangu-52 million endlini eyodwa ngoba uthi banelungelo lokuba ngaphakathi,” kusho uMapena.