Abawatholanga amariphothi befunwa imali
BABUYELE emakhaya belambatha abazali babanye abafundi ebebeyolanda imiphumela yezingane zabo kwezinye izikole KwaZulu-Natal.
AbaseNdondakusuka Secondary, eMacambini, eMandeni bathe kuthiwe abakhokhe imali yokukhokhela onogada besikole ngaphambi kokuthi bathole imiphumela.
ENonopha Senior Primary, KwaSanti abazali bafike kukhala ibhungane othisha bengekho.
Umzali womfundi waseNdondakusuka uthe banqabe ukukhokha uR200 obekuthiwa owokukhokhela onogada ababili abagada kulesi sikole.
Lokhu bekushiwo emhlanganweni wabazali owaphetha ngokuthi abazali badube uthishanhloko owayenze leso siphakamiso. Izolo batshelwe ukuthi abangayikhokhanga leyo mali ngeke bawathole amariphothi ezingane zabo.
“Iyasimangaza le nto esiyitshelwa othisha ngoba emhlanganweni wabazali obungenyanga edlule saphuma emhlanganweni kungavunyelwananga ngale mali. Le mali inkulu ngoba isikole akukhokhwa kuso. Abazali abaningi abasebenzi, baphila ngemali yesibonelelo sikahulumeni. Sizowuthathaphi uR200?” kusho lo mzali. Uqhube wathi le mali kwathiwa abazoyikhokha bayavolontiya akuphoqelekile ukuthi bayikhokhe. “Kushiwo kanjani ukuthi akuphoqelekile uma singasawanikwa amariphothi ngoba kuthiwa angikhokhile? THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. Uthishomkhulu akekho, othisha bathi kuthiwe abasitshele lokho. Kuningi okungacaci ngale mali. Izingane zakulesi sikole zingu-398 uma umfundi ngamunye ekhokha uR100 kuzoba uR39 000 owenele ukukhokhela onogada ngamunye uR1000. UR200 wona owokwenzani?” Ubuze kanje.
Uthe bafike ekuseni banikezwa amapheshana ane-akhawunti yesikole, kuthiwa le mali isizokhokhwa kuyo.
“Emhlanganweni wabazali saduba sahamba. Ubani osevume wona lo R100 okuthiwa uzokhokhwa ebhange? Umhloli kade sikhuluma naye ngalolu daba kodwa uvele athalalilse,” kusho yena.
Umzali ocele ungadalulwa onengane efunda uGrade 9, eNonopha uthe bathola izincwadi ngesonto eledlule betshelwa ukuthi kusukela ngoMsombuluko amariphothi ezingane azobe esenziwe.
“Sifike esikoleni ekuseni kukhona unogada kuphela, wasitshela ukuthi abekho othisha. Sitshelwe ukuthi basebenzela kwesinye isikole eNilgri ngoba bantshontshelwe amakhompyutha esikoleni. Size sahamba singawatholanga amariphothi futhi asazi nokuthi sizowathola nini. Eyami ingane bekumele ngiyihambisele iriphothi kusasa (namuhla) kwesinye isikole ezoqala kuso ngonyaka ozayo,” kusho yena.
EMzomusha Primary eNewtown A eNanda abazali baqhinqe ngaphandle belinde amariphothi. Bathi uthishanhloko ubefuna imali yesikole.
Umzali onezingane ezifunda uGrade 1 no 3 kulesi sikole uthe kufundwa mahhala kusona kodwa uthishanhloko uthe ufuna uR100 wesikole.
Omunye umzali uthe uthishanhloko ugcine ebanikile amariphothi kodwa amagama abo abhalwa phansi ukuze bakhokhe ngoJanuwari.
Ethintwa ngalolu daba uthishanhloko uphikile wathi abazali abanenkinga abeze kuyena.
Okhulumela uMnyango wezeMfundo KwaZuluNatal, uMnuz Sihle Mlotshwa uthe asikho isizathu okumele senze izingane zingawatholi amariphothi.
“Ngisho esikoleni okukhokhwayo kuso umzali uma engenayo imali kumele kuxoxwe ukuthi uzoyikhokha kanjani. Siyabanxusa abazali ukuthi benze izinhlelo zokukhokha kusenesikhathi, ukuze kungabi nenkinga ekupheleni konyaka,” kusho uMlotshwa.
Uthe abangawatholanga amariphothi kumele baxhumane namahhovisi omnyango emasekethe.