Kuzovulwa umgwaqo obalulekile
UZOVULWA ngasekupheleni kukaDisemba umgwaqo ohlanganisa iKosi Bay KwaZuluNatal neMozambique.
Lezi zindaba zivezwe nguNgqongqoshe wezokuThuthukiswa koMnotho, ezokuVakasha nezeMvelo esifundazweni uMnuz Sihle Zikalala.
Uthe umgwaqo uzokwehlisa isikhathi sokuya eMozambique, sisuka emahoreni ayisithupha kuhanjwe amaminithi angu-90 kuphela.
“Umgwaqo ohlanganisa iKwaZulu-Natal neMozambique uzoqinisa ezohwebo ngoba abatshalizimali bayagqugquzeleka ukuthi balethe imali yabo uma sekuthuthukiswe ingqalasizinda. Uzoqinisekisa ukuthi izivakashi zihamba ngokukhululeka ngoba umgwaqo omdala ubungekho ezingeni elikahle,” kusho uZikalala.
Khona manjalo uZikalala ugqugquzele abantu ukuthi bajabule bazinake futhi bangayimoshi imali ngamaholidi.
Udonse ngendlebe abantu ukuthi bangasebenzisi itemu elithi “bajabulisa umzimba osebenzayo” uma sebethenga izicoficofi bemosha imali abayisebenze kanzima.
“Abantu kufanele bathenge izidingo ngoDisemba ngoba uJanuwari uyeza, akufanele uma sizijabulisa sigcine sesingena ezikweletini. Ngithuke kabi ngibona indali ebizwa ngoBlack Friday lapho kwakugcwele abantu. Into engithusayo wukuthi abantu baseNingizimu Afrika bakhithize ukudlula wonke umuntu emhlabeni,” kusho uZikalala.
Uthe ucwaningo lwe-website ebizwa ngePicodi.com luveza ukuthi emazweni acebile iGermany ne-United Kingdom abantu abakhithizanga kakhulu njengaseNingizimu Afrika.
“Siyacela abantu bayeke ukumosha imali ngoba ucwaningo luthi sinezikweletu ezingu-R1.69 trillion singabathengi baseNingizimu Afrika. Asijabule songe imali,” kusho uZikalala.
Uthe abazali abafundise izingane ngokubaluleka kokonga ngoba nazo sezingene emkhubeni omubi wokukhithiza ngoKhisimusi.