Basola abamaziyo ngemali eyebiwe
USULAHLE ithemba umndeni wendoda eyashona ngokuthi uyoyithola imali yayo yasemsebenzini. Usola umuntu osondelene nawo ngokweba umazisi wendodakazi kamufi nekhadi lasebhange wayofaka isicelo semali emsebenzini.
UNksz Stella Mnombo (41) ongunina kaNksz Noxolo Radebe (21) baseChesterville, uvezele Isolezwe ukuthi babelinde uR500 000 emsebenzini kayise kaNksz Radebe oshone nyakenye.
Imali bekufanele iphume ngoMeyi nonyaka kodwa yangaphuma. Kuthe sebeyobheka emsebenzini bathola ukuthi sekukhona oseyikhiphile.
Ngesikhathi bephenya bathola ukuthi umazisi nekhadi lasebhange kukaNksz Radebe akukho endlini.
“Emsebenzini ngesikhathi besitshela ukuthi kukhona ofike wazofaka isicelo sayo saveza isithombe sikamngani wami. Umuntu owamsiza ukuthi afake isicelo semali wavuma ukuthi uyena owayikhipha,” kuchaza uNksz Mnombo.
Uthe baya ebhange nakhona bakhishelwa izithombe eziqoshiwe kwikhamera ezikhombisa umngani wakhe (Nksz Mnombo) ezokhipha imali ebhange.
“Ebhange kuthiwa wafike wathi uNoxolo useyiphara udinga imali yokuthi amyise lapho ezosizwa khona ukuze ayeke izidakamizwa abesecwile kuzona,” kusho uNksz Mnombo.
Uthe ebhange kwavela ukuthi umngani wakhe wathenga imoto iFortuner ngokheshi.
UNksz Radebe uthe ubefisa ukwenza izifundo zobuhlengikazi ngonyaka ozayo kanti sekuzoba nzima njengoba imali kayise engasayitholanga.
Okhulumela amaphoyisa KwaZulu-Natal, uLt Colonel Thembeka Mbele, uthe kwavulwa icala lokukhwabanisa eMgungundlovu kodwa kusaphenywa.
“Mningi umsebenzi wokuphenya okumele siwenze ngoba nasebhange kusafanele kuyophenywa ababesebenza ngesikhathi kufakwa isicelo semali nangesikhathi kukhishwa imali ebhange,” kusho uLt Colonel Mbele.