Izitifiketi emaphoyiseni aphothule ukuqeqeshwa
AZOSIZA ngokubhekana nesiminyaminya samaholidi kaKhisimusi amaphoyisa athole izitifiketi izolo eMgungundlovu, abesohlelweni lokuqeqeshwa eMnyangweni wezokuThutha.
Amaphoyisa angu-34 ahlonishwe nguNgqongqoshe wezokuThutha nokuPhepha koMphakathi esifundazweni, uMnuz Mxolisi Kaunda, ehambisana nethimba labaphathi kulo mnyango.
Ehalalisela amaphoyisa uKaunda uthe umcimbi wenzeke ngesikhathi esifanele njengoba edingeka amaphoyisa azolekelela emgwaqweni ngalezi zinsuku ezimatasa.
“Ngiyanihalalisela futhi nginifisela okuhle kuleli gxathu elisha. Siyaziqhenya ngani, usuku lwanamuhla lusho ukuthi senikulungele ukuphuma niyosiza umphakathi,” kusho ungqongqoshe.
UKaunda uthe ngaphandle kokusiza umphakathi, ukuphasa kwamaphoyisa kusho ukuvuleka kwamathuba emisebenzi emisha okuzonciphisa nezinselelo zokweswela emindenini yawo.
“Ukuqeqeshwa kwenu unyaka owodwa bekuseyisiqalo nje somsebenzi enizobhekana nawo. Umsebenzi omkhulu nizowuthola seniphumele ngaphandle emphakathini. Kuyomele nifunde ukubekezela ngoba kuningi enisazokufunda emphakathini okuzoveza olunye uhlangothi lomsebenzi eniwukhethile,” kugcizelela uKaunda.
Uthe isifundazwe sihlala sinezibalo eziphezulu zezingozi kanti ukuba khona kwamaphoyisa amasha kuzolekelela ezinhlelweni zokuzinciphisa. Unxuse amaphoyisa ukuthi angesabi ukujezisa abazophula umthetho emgwaqweni. Uthe njengoba izibalo zikhomba ukuthi yintsha eshona kakhulu emgwaqweni kumele amaphoyisa azame ukushintsha lolu khondolo. Uwaxwayise nangokuthi angalingeki avumele ukugwazelwa ngabashayeli abaphula umthetho.
“Ningalokothi nivume ukugwazelwa ngisho ngeziphuzo ezibandayo ngoba uma ubanjwa uyojeza kakhulu,” kusho uKaunda.
UKaunda ubuye wahalalisela namaphoyisa athole imiklomelo eyisipesheli ngokuvelela ezifundeni zawo.