Intela kashukela ikhombisa ukukhathalela impilo
KUTHANGI kuphasiswe umthetho ozogunyaza ukuthi kube nentela ezokhokhiswa abathenga iziphuzo ezinoshukela. Le ntela iyingxenye yeRates and Monetary Amounts and Revenue Law Amendment Bill.
Le ntela izoqala ngo-Ephreli 1 ngonyaka ozayo. Kuthiwa lokhu kuzonyusa ezinye iziphuzo ezihlohlozayo ngo-11%.
Abangahambisani nalo mthetho basabambelele ekuthenini ukuphasiswa kwawo kuzonciphisa imisebenzi ezinkampanini ezithintekayo yilesi sinqumo.
Thina siyawancoma amalungu ephalamende aphasise lo mthetho ngoba akhombisa ukukhathalela impilo yabantu baseNingizimu Afrika.
Kumqoka ukuthi izinkampani zisebenze ngokukhululeka kuleli futhi ubudlelwano obuhle phakathi kwazo nohulumeni bubalulekile ngoba zineqhaza elikhulu ekwakhiweni kwamathuba omsebenzi kodwa lokho akubalulekile ukudlula impilo yabantu.
Kuvamile ukuthi uma kuhlongozwa umthetho osomabhizinisi abangahambisani nawo bajahe ngokusabisa ngokuthi kuzoncipha imisebenzi ngoba basuke bezama ukuvalela uhulumeni ekhoneni.
Kuyiqiniso ukuthi ukwethulwa kwale ntela akusho ukuthi bonke abantu bazoziyeka iziphuzo ezinoshukela kodwa bakhona abazozinciphisa nokuyikhona okubalulekile ngoba kumele kuhluleke kuzanyiwe ukulwa nesihlava sokukhuluphala ngokweqile okuhambisana nezifo ezifana noshukela kwabantu baseNingizimu Afrika.
Kumqoka ukuthi imithetho yezwe igqugquzele abantu ukuthi bazinakekele ngoba vele umthwalo wezifo esibhekene nawo njengezwe ngeke siwunqobe ngokukhuphula isabelo-mali okuhlinzekwa ngaso umnyango wezempilo kodwa sizowunqoba ngokwethula izinhlelo zokugwema izifo hhayi ukugxila ekuzelapheni.
Ngo-2015 isifo sikashukela sathatha imiphefumulo engaphezu kuka-25 000. Ngonyaka odlule izikhungo zezempilo zikahulumeni zibike ukuthi kunabantu abasha abangu-10 000 abatholakala ukuthi banalesi sifo njalo ngenyanga.
Lezi zibalo ziyakhombisa ukuthi kumele kwenziwa yonke imizamo ekhona ukulwa naso.