Abaqotho bayabulawa kwi-ANC
MHLELI: Sengibuke okuningi ngohulumeni we-ANC. Kuthe uma ngingaluboni ushintsho ekuthuthukiseni amabhizinisi abantu abamnyama ngabheka umthethosisekelo ukuthi uthini. Ngithole ukuthi kumele uhulumeni ngaphambi kokubeka noma ukushintsha umthetho ayobheka ikhasi 13 isigaba 217 (a no-b) kodwa abakwenzi loko.
Amabhizinisi abamnyama ayahluleka ayawa ngenxa yokuthi uhulumeni kaKhongolose usuthatha idlanzana lamabhizinisi abamnyama nawezizwe bese esebenza nawo iminyaka emithathu kuya kwemihlanu, wena owenza imisebenzi efanayo ongafakwanga awubi nandlela yokusebenza.
Sekuyisikhathi sokuthi sikhombise osopolitiki ukuthi nathi sinawo amandla noma efika kanye emuva kweminyaka emihlanu. Yisiphi isidingo sokuyovota ngo-2019? Le nkinga singayilungisa ngokukhipha leli qembu lethu kuhulumeni ukuze libuye nabaholi abasha ngokhetho olulandelayo. Abakhona manje sebeboshiwe ngoba uma kungena elinye liyophenya konke obekwenzeka bafakwe ejele okutholakala ukuthi bebenenkohlakalo.
Mina engikuqaphelile ukuthi uma uyilungu le-ANC ungathi usuphumelele empilweni, ungathi sigcono kunamanye amaqembu. Sekwaba yifeshini ukuba yilungu likaKhongolose. Ovotela uKhongolose akabuke kahle abuke amathenda ukuthi aphuma kanjani futhi atholwa obani bese uzibuza ukuthi uyoke uyithole yini wena. Abaholi abaqotho, abalwa nabakhohlakele bayabulawa futhi ababoshwa ababulali. Bakhona abaholi abaqotho kw-ANC nabathembekile kodwa bayaxoshwa, bacindezelwe abakwazi ukusivikela. Nathi mphakathi ake sifunde ukuzifundisa imithetho kunokuhlala koFacebook. Asiligodle ivoti lethu ngoba sekuyafana nesikhathi sobandlululo la umuntu omnyama ayengakwazi ukusebenza nohulumeni. Themba Dlamini