Ngibabaza ikhono lomsakazi weRadio 2000
MHLELI: Yize izibalo zithi imisakazo emikhulu yehlelwe abalaleli kodwa ngisayibabaza indlela engatatazeli ngayo iRadio 2000 ezinhlelweni zayo. Uma ulandela izinhlela zayo uyabona ukuthi akukhonziwe ukushintsha izinhlelo, kunalokho kuthakwa umculo.
Uma uzobheka umsakazo owenza inzuzo, okuyi Vuma 103 FM, uwine abalaleli ngenxa yomculo ohlabahlosile odlalwa khona. Yize kunjalo kodwa kukhona lapho iVuma kumele iqinise khona okuwuhlelo lwezemidlalo nolwezindaba. Kobe basebenzile uma bengaletha abanohlonze endimeni yezemidlalo. Asethembe izikhulu zayo zizobona lapho okumele baqinise khona.
Okungenze ngaloba yingoba ngifuna ukubabaza ikhono likaJustice “The Iceman” Ramohlola ohola ithimba lasekuseni kwiRadio 2000 okuyiPlanet Haiboo ngo-6 kuya ku-9. Le nsizwa iyayazi into eyenzayo futhi iyazi ukuthi umlaleli udingani. Umuzwa engena ukuthi unolwazi lonke nobufakazi bento ngaphambi kokuyikhipha emoyeni. Yonke into eyenzekayo neqhamukayo ezweni ikhishwa wuye ngaphambi kokuba eminye imisakazo iyikhiphe.
Ngize ngisole ukuthi bayakopela abanye abasakazi kuyena uma sebeyikhipha emoyeni kweyabo imisakazo. Yize inganakiwe iRadio 2000 kodwa inohlonze ekusinikeni esikudingayo singabalaleli bemisakazo. Phela singabalaleli siyazazi ukuthi yini esiyidingayo, asikhathalele ukuthi umsakazo ongakanani.
Ngiyayinaka into engiyilalelayo futhi ngiyazazi ukuthi ngiwumlaleli onjani. Ngiyafisa ukuthi ngelinye ilanga nizibheke inhlelo zeRadio 2000, ikakhulukazi uhlelo lwasekuseni iPlanet Haiboo. Umlaleli wemisakazo