UBaloyi akazi lutho ngezigidi - ummeli
UMMELI kaMengameli weBlack Business Council (BBC), uNkk Danisa Baloyi, omiswe ngoMsombuluko emsebenzini emuva kokulahleka kuka-R5 million, uthi iBBC iyayazi ukuthi imali yashonaphi.
UMnuz Lesley Ramulifho omele uNkk Baloyi uthe ikhasimende lakhe alazi lutho ngokunyamalala komnikelo ka-R5 million owanikelelwa iBBC yi-Airports Company South Africa (Acsa).
“Ikhasimende lami (uNkk Baloyi) alazi lutho ngokulahleka kuka-R5 million. Ushilo ukuthi uzosebenzisana nabaphenyayo. Okuxakayo wukuthi kungani belandela ikhasimende lami bube bukhona ubufakazi bokuthi imali yahamba kanjani. Ikhasimende lami liyazihlangula kulolu daba,” kusho uRamulifho.
UMnuz Bongani Maseko wakwa-Acsa uthe babezitshela ukuthi umnikelo ungene kwi-akhawunti yeBBC kodwa baxakeka uma iBBC isicela umnikelo wesibili.
“Sibone ngaleso sikhathi ukuthi i-akhawunti esafaka kuyona imali yokuqala ayifani nesiyinikwe okwesibili, sibazisile base bethi bazoqala uphenyo,” kusho uMaseko.
I-BBC iveze ukuthi ibeke uNkk Baloyi amacala okukhwabanisa nokweba.
UNobhala Jikelele weBBC uMnuz George Sebolela uthe bamise uNkk Baloyi bamvulela namacala nenkampani kawoyela negesi iMerit Energy.
Uthe uNkk Baloyi umiswe ngoLwesine oludlule emuva kophenyo oluqalwe emasontweni amabili edlule.
Uveze ukuthi baqoke uMnuz Gilbert Mosena oyiPhini likaMengameli weBBC ukuthi enze umsebenzi kaNkk Baloyi ngesikhathi kusaqhutshwa uphenyo.
Uthe abazi ukuthi imali ingene kanjani kwiakhawunti yenkampani eseCape Town kodwa wuphenyo oluveza konke.
“Uphenyo luzocacisa ukuthi imali ifinyelele kanjani enkampanini kaNkk Hawa Bibi Khan ongesilo ilungu leBBC,” kusho uSebolela.
Uziphikile izinsolo zombango wezikhundla esho nokuthi wonke amalungu anobudlelwano obuhle.
Uphethe ngokuthi bazokwenza konke okusemandleni ukuqinisekisa ukuthi isithunzi seBBC siyavikelwa kulungiswe nodaba lokunyamalala komnikelo.