Bafuna kuboshwe abenyama yenkukhu yangaphandle
ABEMBONI yenyama yenkukhu eNingizimu Afrika bafuna kushushiswe izinkampani zakwamanye amazwe ezigcwalisa amaphisisi enkukhu kuleli ekubeni ikhona ekhiqizwa kuleli.
UMnuz Francois Baird ongesinye sezikhulu senhlangano elwela imboni yenyama yenkukhu eNingizimu Afrika, iFairPlay, uthe kufanele kube yicala ukulahla amaphisisi ongawadingi kwelinye izwe.
“Amaphisisi akwamanye amazwe abulala imboni yethu ngoba afika eshibhile kwazise awadingeki ezweni lawo asuke esezolahlwa emakethe yethu. Sisebenzisana nemboni yaseGhana yenyama yenkukhu ngoba nayo inenkinga efana neyethu. Sifuna bashushiswe abalahla amaphisisi e-Afrika,” kusho uBaird.
Uthe bazoqhubeka nokufaka ingcindezi kohulumeni base-Afrika ukuthi baqinisekise ukuncintisana okuhle kule mboni.
“Thina uma sithumela inkukhu e-Europe, iEuropean Union inemicikilisho eminingi okufanele siyilandele kodwa thina uhulumeni wethu akanayo leyo mithetho eqinile, uvele abavumele ukuthi balahle amaphisisi abo,” kusho uBaird.
Isikhulu se-South African Poultry Association uDkt Charlotte Nkuna sithe uhulumeni kufanele abe nentela ephezulu emaphisisini avela kwamanye amazwe ngoba nabo uma bethumela umkhiqizo wabo ezimakethe zomhlaba bayabulawa ngezindleko.
Uveze ukuthi amaphisisi akwamanye amazwe yiwona aholela ekudilizweni kwabantu embonini yezinkukhu.
UMnuz Victor Oppong Adjei, onguSihlalo weGhana National Poultry Association uveze ukuthi ngaphambi kokuthola amaphisisi angaphandle abantu bebedla inkukhu yaseGhana kodwa manje sebekhiqiza u-5% kuphela wenkukhu edlilwa kuleliya lizwe.
Uveze ukuthi uma kungaqiniswa umthetho wokulethwa kwezinkukhu zaphesheya emazweni ase-Afrika bangaqasha abantu abangu-200 000 kunabangu-10 000 abaqashwe embonini yezinkukhu yaseGhana njengamanje.
“Into ebuhlungu wukuthi amazwe angaphansi kwe-European Union, Brazil, United States namanye adayisa izinkukhu zawo emazweni anomnotho ontengayo. Akukho asiza ngakho ukunyusa umnotho wamazwe ase-Afrika ngoba uma elahla amaphisisi ashibhile lapha kusho ukuthi imboni yethu yezenkukhu iyafa. Akekho umuntu ohlomulayo kunalokho sifakwa enhluphekweni,” kusho uAdjei.
Uthe bafuna amaphisisi afakwe ilebuli ecacisayo ukuthi akhiqizwe kuliphi izwe, izinkampani eziwaletha e-Afrika zikhokhiswe intela enkulu ngoba zibulala umnotho wamazwe ase-Afrika.
UNobhala Jikelele we-Food and Allied Workers Union (Fawu) uMnuz Katishi Masemola uthe eminyakeni emihlanu edlule sekudilizwe abantu abangu-7 350 uma kubalwa nabangu-1 300 abaphelelwe wumsebenzi kwaRCL Foods, eHammarsdale kulo nyaka.
Ugqugquzele abantu bakuleli ukuba bathenge amaphisisi nezinkukhu zakuleli ukuze abantu bangaphelelwa wumsebenzi.
“Kufanele siyibheke yonke into esiyithengayo ukuthi ineflegi laseNingizimu Afrika.
Uma inkukhu ingenalo iflegi laseNingizimu Afrika kusho ukuthi akuyona eyakuleli,” kusho uMasemola.