Uzohambela izifunda esiza intsha ehwebayo
UFUNA ukusiza intsha esingene emabhizinisini nefuna ukukhula kulo mkhakha, uMnuz Thulani Thabethe waseMndeni eSoweto, ozoba nezingqungquthela kulona lonke leli ngokuqala konyaka.
Injongo enkulu ngalezi zingqungquthela, ukusiza intsha ukuthi ingawakhangisa kanjani amabhizinisi ayo ukuze aqhubeke nokuheha abathengi.
UThabethe unenkampani i-2larnie Solutions esiza osomabhizinisi ukuthi bakwazi ukukhangisa futhi badayise imikhiqizo yabo ezindaweni ezahlukene kuleli.
Ukuqala kukaJanuwari le nsizwa izohambela eThekwini namaphethelo lapho izohlangana nosomabhizinisi abasebancane ibacushise ukuthi bangasizakala kanjani.
Enkulumeni abe nayo neSolezwe uThabethe uthe, ukubona intsha iqala amabhizinisi amancane kodwa asheshe ashabalale yikhona okumenze wasukuma.
“Ukubona umuntu eqala ibhizinisi futhi likhule ngokushesha kuyajabulisa. Kodwa kukhona aqala kahle agcine eseshabalala abantu bazibuze ukuthi sekwenzakaleni.
“Lokhu kudalwa ukungalikhangisi ngendlela ibhizinisi okuyinto ebalulekile,” kuchaza yena.
Uthe ukuvula kwakhe leli bhizinisi injongo yakhe enkulu ukusiza osomabhizinisi abasakhula.
“Yize sengisize izinkampani ezifana noMakro, MiWay, Hisense Builders Warehouse nezinye ekukhangiseni nasekuthengiseni imikhiqizo yazo kodwa ngisamile ekutheni nosomabhizinisi abancane basadinga ukuboniswa lapha nalapha. Yingakho ngihlele ukuhambela amadolobha ahlukene nje,” kuchaza yena.
Uthe iphupho lakhe ekhula kwakuwukuba wumlingisi nomethuli wezinhlelo kuthelevishini kodwa ukungawatholi amathuba kulo mkhakha yikhona okwamfaka ebhizinisini.
“Ngaqala ngasebenza eCall Centre ezinkampanini ezahlukene. Ngendlela engenza kahle ngayo ngalesi sikhathi ngidayisa, ngavuleka amehlo ekutheni kuningi engingazenzela khona uma ngingaqala eyami inkampani,” kuchaza yena.