‘Jabula kodwa ungakhohlwa yizikweletu’
KUGQUGQUZELWA abantu ukuthi bakhokhele omasingcwabisane nezinye izikweletu ezibanjwa ebhange njengoba kuwuDisemba.
UMnuz Ryan Prozesky oyisikhulu esibhekelele ezabathengi kwaFNB uthe akulona isu elihle ukungakhokhi izikweletu ngoDisemba, abale kuzo omasingcwabisane, yimishwalense namabhondi ezindlu.
UProzesky uveze ukuthi abantu bashesha bahole ngoDisemba bese bedla imali bakhohlwe ukuthi ngoJanuwari imishwalense izobe isibamba kabili.
“Siyavuma abantu kufanele bajabule ngoDisemba, bazijabulise ngezinto ezihlukene kodwa akufanele badale izikweletu ezingenasidingo. Abajabule kodwa bangakhohlwa yizikweletu. Kufanele bakhokhele zonke izikweletu zabo ezijwayele ukudonsa ebhange ngoDisemba ngoba ngoJanuwari isimo sibanzima,” kusho uProzesky.
Uthe uma umuntu ekhokha u-R2 000 esikweletini sakhe bese esiziba ngoDisemba, abakweletayo ngeke bakhohlwe wukuthatha imali ngoJanuwari bazobe sebetha uR4 000 wonke bebhanqa nale obungayikhokhanga.
“Kunemishwalense evele iphelelwe yisikhathi uma ungakhokhanga izinyanga ezimbili. Kubalulekile ukuthi sikhokhe ngoDisemba ngoba kungenzeka noma yini ngesikhathi ungakhokhile. Ukungakhokhi ngesikhathi kuphinde kungcolise igama lakho ngakho asiqaphele ukuthi siyisebenzisa kanjani imali ngoDisemba,” kusho uProzesky.
Udonse ngendlebe abantu ukuthi uma kukhona imishwalense efuna ukudonsa imali ngoDisemba 15 kufanele bavume ukwenza lokho ukuze bangabi nezikweletu ezingenasidingo.
“UJanuwari kufanele kube yinyanga yokuqala impilo entsha hhayi eyokuyoboleka imali ngoba umshwalense ungakhokhelwanga. Kufanele abantu bahlele kahle imali ukuze babe nemali yokugibela ngoJanuwari, babe neyokukhokhela izingane esikoleni neyokuthenga igilosa. Akufanele kube nama-debit order angakhokhelwa ngoba kuthenjwe ukuthi ngonyaka ozayo izinto zizobalula,” kusho uProzesky.