Iseluleko sikaMcCarthy asibhekise kwiSafa
UMQEQESHI weCape Town City uBenni McCarthy ucebisa iSouth Africa Football Association (Safa) ngeqhinga lokugwema isihlava esibi sabadlali abachizela iqembu lesizwe.
Sekuphenduke insakavukela ukuthi abadlali bavele balibeke ngembaba elokuthi abezi ukuzodlalela iBafana Bafana. Muva nje kusanda kuvela ukuthi uThulani Serero watshela izikhulu zeSafa ukuthi ngeke eze ukuzodlalela iBafana uma engeke aboshelwe esikimini. USerero ugijima kwiVitesse yaseHolland.
Abadlali abachizele iBafana eminyakeni eyedlule uKamohelo Mokotjo, Dino Ndlovu, Kermit Erasmus, May Mahlangu, McCarthy, Quinton Fortune, Mark Fish noTokelo “TK” Rantie.
UMcCarthy exoxa nabezindaba ePrincess Magogo Stadium, eThekwini, ngemuva komdlalo wezakhe neMaritzburg United, ululeke iSafa ngeqhinga acabanga ukuthi lingasiza ukuqeda isihlava sabadlali abasolwa ngokudelela iqembu lesizwe. “Abantu (iSafa) badinga ukuhlala phansi bayifakele izibuko indaba yabadlali abagijima phesheya. Kumele kuhlalwe phansi nomdlali neqembu adlala kulona bese kuphunywa nesivumelwano phakathi kwalezi zinhlangothi nososeshini wethu.”
IBafana igcine ihluleke yancama wukuzibekisela indawo kwiNdebe yoMhlaba eseRussia ngonyaka ozayo.
“Kumele kuvele isisombululo esizokwenza zonke izinhlangothi zijabule. Inkinga esibhekene nayo manje wukuthi sigcine singakwazanga ukuthola iqiniso nomnyombo wenkinga ngoba omunye uthi omunye uthe bese kufika omunye athi kushiwo lokhu.
“Uma kungekho ukuxhumana okuqondile sizohlale sibhekana nenkinga efanayo ngaso sonke isikhathi lapho abadlali bechizela khona iqembu lesizwe. Ekugcineni abadlali bathathwa njengabantu ababi bese usoseshini ube muhle. Le nto kumele ishintshe,” kusho uMcCarthy.
IBafana isiyoze idlale ngonyaka ozayo uma isibhekene neLibya emdlalweni wokuhlungela ukuzibekisela indawo kwiAfrica Cup of Nations (Afcon) eseCameroon ngo-2019. Umdlalo weBafana neLibya useMoses Mabhida Stadium, eThekwini ngonyaka ozayo.