Ugane unwabu begudluzwa yiDowns
USALE ecikekile umqeqeshi weBaroka FC, uKgoloko Thobejane, yindlela ezakhe ezidlale ngayo iMamelodi Sundowns ibukisa ngabo emdlalweni we-Absa Premiership eLucas Moripe Stadium ngoLwesibili ebusuku.
IBaroka okuqale isonto iqhwakele kwi-log ibhaxabulwe ngo 4-0, yagudluka esicongweni indawo yathathwa yiSundowns ngenxa yamagoli amaningi yize belingana ngamaphuzu angu-19.
Amagoli amaBrazilians ashaywe nguMotjeka Modisha, okube yiphenathi emizuzwini emibili kuqale umdlalo. UPercy Tau ushaye amagoli amabili, elinye kwaba elikaThemba Zwane.
Ngaphambi kokuthi kuqale umdlalo uThobejane, obekhuluma ngokuzethemba ngokuthi ezakhe zizoqhubeka nokuqhwakela, ugcizelele elokothi akumele bavumele iSundowns ilibone kuqala ipali.
“Ngiyazi wonke umuntu ufuna ukusibona sishona phansi kodwa okwethu wukuthatha umdlalo ngamunye. Kusemqoka ukuthi sishaye amagoli kulo mdlalo kodwa uma belishaya kuqala sizothwala kanzima,” kusho uThobejane ngaphambi komdlalo.
Ephawula kwithelevishini ngemuva kwenduku ubebonakala ebusweni ukuthi ucasukile.
“Awukwazi ukuthi ungalokhu uhleli emuva, uma wenza njalo uvumela izithatha ukuthi zize kuwena.
“Thina besilahla ibhola kodwa kuthathe isikhathi ukuthi siyovala, uma bona belilahlile bebecindezela ngokushesha. Yilowo ke umehluko phakathi kwamaqembu abedlala.
“Ukuze unqobe umdlalo kufanele ucindezele izitha ngokuthi ibhola lihlale ngakuwena, hhayi lokhu ebesikwenza ukuthi sichithe isikhathi esiningi sihleli emuva,” kusho uThobejane.
Yize ebenokufutheka kodwa ubuye wawaphinda amazwi akhe emihla ngemihla okuthi bona bazofaka umbango wesicoco. Kusasa iBaroka izovakashela iMaritzburg United eHarry Gwala Stadium ngo-8 ebusuku. Izofika i-United inokuzethemba ngemuva kokunqoba umdlalo wayo wokuqala ngemuva kweyisishiyagalombili inganqobi.
ITeam of Choice ishaye iCape Town City ngo 4-2 emdlalweni obusePrincess Magogo Stadium ngoLwesibili ebusuku.
“Ibhola linjena, ngeke sibanqamuleze abafana ngalokhu abakwenzile. Ngisakholwa wukuthi sizokwenza kahle,” kusho uThobejane.