Ukhala ngamafutha kumdlali weCity
KUKHALWA ngokukhuluphala komdlali weCape Town City neBafana Bafana u-Ayanda Patosi ongakafiki ezingeni lakhe kusukela ekhuze ibuya kwi-Absa Premiership.
UPatosi ujoyine iCity ekuqaleni kwesizini esuka kwiLokoren yaseBelgium. Ufike kuleli qembu elisungulwe ngonyaka odlule wathatha unombolo 10 kodwa kuze kube yimanje akukho okutheni okubabazisayo asakwenzile.
Isikhulu seCity, uJohn Comitis sitshele abezindaba ukuthi uPatosi kumele ehlise amafutha emzimbeni. UPatosi ulimale kabuhlungu ngesikhathi ezakhe ziqunjwa phansi yiMaritzburg United ePrincess Magogo Stadium, KwaMashu. ICity iguqiswe yiTeam of Choice ngo 4-2 emdlalweni obungoLwesibili ebusuku.
“UPatosi simlandele ukuzovala indawo kaLebo Manyama obedlala ngemuva kwabagadli. Yize ebewashaya amagoli uManyama kodwa ubengesiyena umgadli, ubedlala ngemuva kwabagadli. UPatosi kumele abhukule ngoba unekhono. Uyakhombisa yena ukuthi kukhona azosinika kona kodwa kusamele ehlise amafutha ezimbeni.
“Uyabona ukuthi ungumdlali oseqopheweni eliphezulu kodwa udinga ukuba sesimeni esikahle ngokomzimba ukuze ezoba ngcono. Uma eke wangena egiyeni iqembu lonke lizophaphama. Ufike lapha kithina emkhulu ngamakhilo ayisithupha kunasehle ngawo. Yingakho sekumthathe isikhathi ukungena egiyeni. Kumele abuyele esimeni ngoba ubengadlali isikhathi eside futhi kuyabonakala,” kusho uComitis.
ULehlohonolo “Major” Majoro inkontileka yakhe iyaphela ngoJuni. UComitis uphumele obala ngesifiso sakhe sokugcina lo mdlali.
“UMajoro udlalile namuhla (esho ngoLwesibili). Indlela agijima ngayo ngeke usho ukuthi ukule minyaka akuyona. Sinesikhathi sonke sokudingida ikusasa lakhe futhi isifiso sethu wukuthi ahlale eqenjini. UMajoro usesezinhlelweni zeqembu,” kusho uComitis.
Abanye abadlali okuvela ukuthi bagaqelwe yiCity nguMandla Masango noBrilliant Khuzwayo weKaizer Chiefs.
“UMasango bese ngivumelene ngayo yonke into neqembu lakhe eDenmark kodwa wafuna izindlodla engingeke ngikwazi ukuzikhokha. Ubezoqala ukudlala kithina ngoJanuwari. Okwamanje ngeke sikwazi ukumkhokhela le mali ayifunayo. Ngeke simthathe ngale mali ayifunayo kodwa uma eshintsha umqondo singaxoxa.
“Ithimba lami elingithungathela abadlali likhumile noTim Sukazi ngoBrilliant Khuzwayo kodwa basitshelile ukuthi usenenkontileka neKaizer Chiefs futhi ngeke sikwazi ukukhuluma naye kuze kube nguJanuwari. Uma ezimisele ngokukhuluma nathi ngoJanuwari singajabula ngoba ungunozinti oseqophelweni eliphezulu. Singathanda ukuba naye ngoba uShu-Aib Walters useneminyaka engu-35. Indawo yasemapalini ngenye yezindawo esifuna ukuziqinisa,” kusho uComitis.