Basaqhubeka nokumangalela owezokuThutha
USOSESHINI waseKlipriver uyaqhubeka nokumangalela uMnyango wezokuThutha KwaZulu-Natal ngesinqumo sawo sokumisa amatekisi abo njengoba imizila yamabanga amade usayivalile.
Badinwe bathelwa ngamanzi abaholi balo soseshini abathi kudlalwe ngabo bephucwa umsebenzi okungowabo ngaphandle kwesizathu esizwakalayo.
Bathe lesi senzo somnyango sihlukumeze imindeni yabo nomphakathi wonke waseMnambithi.
Usihlalo nekomiti lonke lalo soseshini izolo babe nengxoxo ekhethelekile neSolezwe emahhovisi abo, lapho beveze ukuthi balimele kakhulu ngesinqumo uNgqongqoshe uMnuz Mxolisi Kaunda asithathe ngaphandle kokubonisana nabo futhi wabathwalisa kanzima ngokwebhizinisi.
UMnuz Bhekuyise Masondo, ongusihlalo, uthe akukho okubajabulisa ngokubuyiswa kwamatekisi ahambela eMnambithi namaphethelo ngoba basagwetshiwe emabangeni amade futhi babekelwe imibandela engaphezu kwamandla abo.
“Asineme neze, sihlukumezekile. Ungqongqoshe neSantaco badlale ngathi ngokuvumelana ukuthi bamise imizila yethu ngaphandle kwesizathu esizwakalayo. Ungqongqoshe uthe lokhu ukwenze ngoba sekufe abantu abangu-61 aphinde athi abangu-71. Labo bantu akhuluma ngabo ngabe yibaphi. Sizoqhubeka nokuphikisa ukuvalwa kwethu enkantolo.
“Okubuhlungu wukuthi amabanga amade esinemvume yokuwasebenza asivumelekile ukuthi sisebenze kuwo, sihamba eMnambithi kuphela. Nakhona kunombandela wokuthi uma kukhona umuntu ozobulawa sizomiswa futhi,” kusho uMasondo.
Bathe okubaphatha kabi wukuthi uma kukhona umuntu ozohlasela waseKlipriver noma bengenawo amandla okukuvimba lokho bazomiswa.
Usihlalo uthe okwenza isilonda sinsonsothe kakhulu wukuthi ngokwamaphepha asenkantolo umnyango ufakaza okungelona iqiniso ngokuthi uyedwa kuphela umuntu okulososeshini onemvume yokusebenza amabanga amade, baphinde bathi usihlalo ubengezi kweminye yemihlangano yokuxoxisana nekomiti lalo soseshini lithi alimazi.
“Iqiniso lithi umsebenzi wamabanga amade, ngokwenkantolo, owethu futhi nongqongqoshe uyasho ukuthi uyasihlonipha leso sinqumo. Thina esingabanikazi bomsebenzi siyahlukumezeka,” kusho uMadondo.
Kumanje amatekisi alo soseshini awavumelekile ukuhambela amabanga amade okubalwa eThekwini, Mgungundlovu, Dundee, Newcastle nakwamanye amadolobha.