Izinhlelo zokusiza abafundi abangazifakanga izicelo
INHLANGANO emele amanyuvesi i-Universities South Africa (USAF) ithi kunezinhlelo zokusiza abafundi abangazifakanga izicelo zokufunda kulo nyaka.
Le nhlangano ithi zonke izikhungo zizobamukela abafundi abangazifakanga izicelo zokufunda kodwa yanxusa ukuthi abafundi balandele imigudu efanele ukufaka lezi zicelo.
USolwazi Ahmed Bawa, oyisikhulu esiphezulu sale nhlangano, uthe akuyona into entsha ukugasela kwabafundi bengazifakanga izicelo zokufunda emanyuvesi ngoba yinto eyenzeka minyaka yonke kodwa banezinhlelo zokubasiza.
Uthe amanyuvesi azobazisa abafundi ngezinhlelo zokubemukela wathi nesikhungo soMnyango weMfundo kuzwelonke sokufaka izicelo iCentral Applications Clearing House sizobasiza.
“Lesi sikhungo sithola amanyuvesi angagcwele ukuze abafundi bathole izikhala. Asifuni futhi bame kolayini abade bashiswe yilanga besalinde ukuzwa ukuthi isikhala sikhona yini kuleyo nyuvesi. Asifuni kuphindeke inhlekelele eyenzeka, lapho kwashona umzali kunyathelwana eNyuvesi yaseJohannesburg,” kusho uBawa.
Uthe abafundi bazokwamukelwa uma kungukuthi zisekhona izikhala.
“Amanyuvesi ngeke anyuse isibalo sabantu abazothathwa ngoba lokhu kunomthelela. Ukuthi bangaki abazothathwa kulele ekutheni ikhona yini ingqalasizinda ehambisana nalokho.”
Le nhlangano ihlangane noMnyango weMfundo ephakeme nesikhwama esixhasa abafundi ngezimali iNational Students’ Financial Aid Scheme ngoMsombuluko ukuzoxoxa ngokwamukelwa kwabafundi kulo nyaka.
Okhulumela uphiko lwentsha ye-EFF, uMnuz Mangaliso Sambo, uthe bahlangene nomnyango, abamanyuvesi kanjalo namakolishi ngezinto abakhala ngazo. Uthe kubhungwe ngezinto eziningi ezithinta imfundo yamahhala, ukungakhokhi imali yokubhalisa emanyuvesi nasemakolishi.
IKhomishini yamaLungelo aBantu inxuse ukuthi kusetshenziswane ukuze uhlelo lokubhaliswa kwabafundi lube nokuthula.
Le nhlangano ithe kubalulekile ukuthi izinkinga zisheshe zixazululwe ukuze kungaqubuki udlame, kushiswe impahla bese kuphazamiseka ukufunda. Esitatimendeni ithe uhulumeni kumele achazele umphakathi ngokuthi izohlinzekwa kanjani imfundo yamahhala.
Zingu-208 000 izikhala ezikhona emanyuvesi kulo nyaka, babalelwa ku-150 000 abafundi abaphasa ngama-bachelor kwa-matric abazokwazi ukungena emanyuvesi akuleli.