Ukhala ngesibhaxu esitokisini umlimi ‘owabulala’ kufihlwa
UKHALE ngesibhaxu seziboshwa atoke naso umlimi waseCramond obhekene necala lokubulala omunye wabahlali basepulazini lakhe esemngcwabeni emasontweni amabili edlule.
UMnuz Phillip Walter Solomon (65) ongumnikazi weCraigs Farm eyingxenye ye-Otto Bluff Farm usolwa ngokubulala uMnuz Mothi Ngubane (42) owayesemngcwabeni wakwaLembede.
Lo mlimi obecela ibheyili eNkantolo yeMantshi eMshwathi izolo kuvele ukuthi kwaphela amahora amabili egoloza ukuboshwa.
Umphenyi wecala, uWarrant Officer Sibusiso Mchunu, uthe uphenyo lukhomba ukuthi impilo kaSolomon yayingekho engcupheni ngesikhathi edubula ngoba akekho owayephethe isibhamu emngcwabeni.
Lokhu kuyashayisana nokushiwo uSolomon esitatimendeni esifundwe ngummeli wakhe, u-Advocate Bret Osborne, esithi amadoda amahlanu amjaha ezama ukumbamba efuna ukumshaya. Wabaleka wangena ehlathini ezungezwa amadoda, ngenxa yokwesaba wadubula ebhekise kuwo, kwadubuleka umufi.
UWarrant Officer Mchunu uthe ofakazi ababekhona kwenzeka isigameko bathi umsolwa wafika kunomuntu owayefaka izingodo ethuneni, waxosha abantu ethi abayeke ukungcwaba.
Kwasuka amadoda aya kuye ayomncenga, emchazela ukuthi umngcwabo kumele uqhubeke. Wahlehla kwaba sengathi uyahamba, waqhubeka umngcwabo ngemuva kwemizuzu emithathu ehambile, wabuya.
“Ofakazi bathi wathi: ‘hhayi la!’ Emuva kwalokho waqhumisa isibhamu kabili. Umufi oke wasebenza kuleli pulazi wasuka esixukwini ethi uyomncenga. Eseseduze, umsolwa wambamba wamdubula amahlandla amathathu wafela lapho. Waqhubeka waya ethuneni, ehla enyuka eduze kwalo abantu sebebalekile. Ngemuva kwemizuzu engu-10 kuya kwengu-15 wahamba waya emzini wakhe.”
Uthe umndeni ungcwabe egcekeni ngenxa yokuthi akusikho okokuqala uba nenkinga yokungcwaba ilungu lawo kuleli pulazi njengoba kwenzekile naphambilini kushone umama wekhaya.
Umngcwabo waze wahlehliselwa usuku olulandelayo.
UMchunu uthe umndeni uzamile ukuxhumana noSolomon ngaphambi kokungcwaba kodwa engatholakali.
“Umndeni uthe uzame ukuya kwakhe uyomazisa ngomshophi owuvelele uyocela nokuthi awuvulele ungcwabe lapho bengcwaba khona okunocingo lukagesi khona kodwa wangakwazi ngoba amasango amathathu omuzi wakhe ahlala ekhiyiwe. Bamshayela ucingo lwangangena, weza emaphoyiseni nawo amshayela angamthola. Umndeni waya nakumfowabo kamsolwa ongahlali epulazini uyomazisa,” kuchaza uMchunu.
Esitatimendeni, uSolomon uthe abakwaLembede abakaze basebenze epulazini lakhe futhi abazange bagunyazwe ukwakha endaweni abakhe kuyo.
Uthe abazange bamtshele ukuthi bazongcwaba nokuthi bashonelwe kodwa watshelwa ukuthi kunomuntu owafika ecela ukungcwaba wangasho ukuthi ungubani. Wenqaba. Uthe imithetho elawula amapulazi ayicacisi kahle ngokungcwaba.
USolomon ufake isicelo sokuthi ahlaliswe yedwa ezitokisini ngoba uyaphela isibhaxu sezinye iziboshwa, inkantolo isivumile lesi sicelo.