Isexwayiso ngokukokotela izitifiketi kwabafeyile u-matric
INHLANGANO okuhlolwa kuyo ubuqiniso beziqu nezitifiketi zika-matric isinxuse abafundi abafeyile u-matric nabangakwazi ukungena ezikhungweni zemfundo ephakeme ukuthi bangakokoteli izitifiketi zabo ngoba befuna ukuthola umsebenzi noma isikhala sokufunda.
Le nhlangano, iManaged Integrity Evaluation (MIE), ithe nakuba izinga lokuphasa kwamatric lenyukile laba ngu-75.1% kodwa yidlanzana elizongena emanyuvesi.
Isho lokhu nje babalelwa ku-150 000 abafundi abaphase ngama-bachelor azobenza bangene emanyuvesi kubafundi ababalelwa ku-650 000 ababhale u-matric ngonyaka odlule.
Isikhulu se-MIE, uNksz Ina Van der Merwe, sithe abafundi abangakwazi ukungena emanyuvesi bazoncintisana nabafuna umsebenzi.
“Abanye abafundi kungenzeka balingeke bakokotele imiphumela yabo ukuze babe semathubeni okuthola umsebenzi njengoba nezinga lokungasebenzi limi ku-38% kulabo abaneminyaka engu-15 kuya ku-24. Yisikhathi esinzima lesi kubafundi, ukukokotela imiphumela kungabafaka kwenkulu inkinga yokuthi balahlekelwe wukwethenjwa nokungaqasheki ngomuso,” kwexwayisa uNksz Van der Merwe.
Uthe ucwaningo abalwenze kuqala unyaka nyakenye luveze ukuthi abaqashi abaningi bayazibheka iziqu zabasuke befuna umsebenzi.
“Ukubhekwa kweziqu kulele isibili ezintweni ezibhekwa abaqashi, eyokuqala abayibheka kakhulu yirekhodi lokulahlwa amacala. Ucwaningo luveze ukuthi siyanda isibalo sezitifiketi zika-matric ezikokotelwayo ngabasuke befuna umsebenzi,” kusho uNksz Van der Merwe.
Uthe kufakana enkingeni ukukokotela iziqu kunokuthi uthi awunawo u-matric.
Minyaka yonke le nhlangano ibheka iziqu ezingumkokotelo isebenzisana nezinkampani ezehlukene.
UNksz Van der Merwe uthe abafundi abangaphumelelanga kumele babheke amaphepha abebewabhala bacele ukuphinda bamakelwe ngoba yilungelo labo.
Uthe bangabhala nezivivinyo zokuchibiyela leli banga ukuze babe no-matric osemthethweni kunokuwukokotela.
“Bangaphinda nonyaka wonke ukuze bathole imiphumela emihle noma baye emakolishi bayokwenza imikhakha elingana no-matric. Ngaso sonke isikhathi kumele uhlale ukhuluma iqiniso ngemiphumela onayo ngoba ukwenza umkhonyovu kungenza ungaqasheki,” kuxwayisa uNksz Van der Merwe.