Kumenyezelwe ijaji lekhomishini ezophenya ukulawulwa kombuso
LUGCINE lugobile uphondo kuMengameli Jacob Zuma njengoba ebengaphansi kwengcindezi yokuthi aqoke ikhomishini ezophenya ngezinsolo zokulawulwa kombuso yidlanzana.
Izolo uZuma umemezele ukuthi iNhloko yamaJaji uMogoeng Mogoeng uqoke iPhini lakhe uJaji Raymond Mnyamezeli Mlungisi Zondo ukuthi aphathe le khomishini.
Yize uZuma wayeyalelwe nguMvikeli woMphakathi osewaphuma esikhundleni u-Adv Thuli Madonsela ukuthi aqoke ikhomishini kodwa ubehudula izinyawo.
Kushone elayizolo abantu bethi uZuma wenza lokhu ukuzivikela kwazise namhlanje kunomhlangano obhekwe ngabomvu wesigungu esiphezulu se-ANC njengoba kubhekwe ukuthi kubhungwe ngekusasa lakhe njengoMengameli wezwe.
Kunengcindezi yokuthi ehle esikhundleni njengoba abaholi abangaphakathi kwi-ANC bezwakalisa ukungenami ngobuholi bakhe.
Umhlaziyi wezepolitiki KwaZuluNatal uMnuz Thabani Khumalo, okhulume neSolezwe ngaphambi kwesinqumo sikaZuma, uthe uyacabanga ukuthi isigungu (iNational Executive Commitee NEC) se-ANC sizothatha isinqumo sokuthi simgudluze uZuma.
“Lolu daba ngilubuka lusukela emphumeleni wengqungquthela kazwelonke. Ngiyakholwa ukuthi kukhona abaholi benhlangano abahlala phansi babuka ukuthi kukhona okuyicathamelayo, bavumelana ngokuthi akwakhiwe uhlaka lwabaholi abayisithupha olufaka zonke izinhlangothi,” kusho uKhumalo.
Uthe abaholi abaqhamuka neqhinga yibona futhi abucubungula indaba yekusasa likaZuma. Uthe akangabazi ukuthi udaba lwekusasa likaZuma luzoba phambili emhlanganweni weNEC.
“Angiboni uphela unyaka uZuma esengumengameli. Uma i-ANC izimisele ngempela ngokuzivuselela kumele umengameli wezwe ashenxe ngoba unamatwayitwayi amaningi,” kusho uKhumalo.
Omunye umhlaziyi wezepolitiki, uMnuz Bukani Mngoma uthe akaboni uZuma ekhishwa esikhundleni.
“Kunzima ukuthi iNEC ingakwazi ukuthatha isinqumo esifana naleso ingakabunjwa ngisho iNational Working Commiitte (NWC),” kusho uMngoma. Uthe uma iNEC ingase ithathe isinqumo sokuxosha uZuma, lokho kungaphazamisa imigubho yenhlangano yokuphela kweminyaka engu-106 yasungulwa.
“Singaba muncu isimo futhi abalandeli bakaZuma ngeke baze bakujabulele ukuba ingxenye yemigubho uma umholi abamkhonzile esexoshiwe,” kusho uMngoma,
Baningi abaholi be-ANC okubalwa kubo uNgqongqoshe wamaPhoyisa uMnuz Fikile Mbalula asebephumele obala baphawula ngodaba lukaZuma.
UMbalula uthe ukukhishwa kukaZuma kungayisiza i-ANC ikwazi ukubuyisa isithunzi sayo ebesesilahlekile emphakathini.
Ngakolunye uhlangothi, uSihlalo kazwelonke weMKMVA uMnuz Kebby Maphatsoe uxwayise ngokuthi ukukhipha uZuma kungalahlekisela uKhongolose ngamavoti.