‘Akuthusi okwenziwa yiDA kuDe Lille’

UMHLAZIYI wezepolitiki, uMnuz Thabani Khumalo, uthi akuthusi ukubona iMeya yaseCape Town, uNkk Patricia De Lille, ibhekene nenselelo yokuthi ikhonjwe indlela yiDA.

UNkk De Lille usolwa ngokufihla izinsolo zenkohlakalo kuMasipala waseCape Town.

Engxoxweni neSolezwe izolo, uKhumalo uthe iDA inomkhuba wokuthi ifike isebenzise abantu kuthi uma isikuzuzile ekufunayo bese iyabalaxaza kuhle kwenyongo yenyathi.

“Ngadideka kwasekuqaleni ukuthi uNkk De Lille wayijoyina kanjani iDA ngoba banemibono engafani, ikakhulukazi njengoba ephuma kwiPAC,” kusho uKhumalo.

Uthe iDA yayihlose ukuzuza ivoti lamakhaladi ngokusondeza uNkk De Lille obeneqembu lakhe i-Independent Democrats.

“Akusikho okokuqala iDA yenza le nto. Ike yakwenza nakuMnuz Joe Seremane naye owayephuma kwiPAC, owenziwa iPhini likaMnuz Tony Leon yagcina isiphelile indaba yakhe,” kusho uKhumalo.

Uthe ngeke athuke futhi uma noMnuz Mmusi Maimane esekhonjwa indlela yiDA.

Omunye umhlaziyi wezepolitiki uMnuz Bukani Mngoma uthe usenkingeni uNkk De Lille uma izinsolo abhekene nazo ziyiqiniso.

“UNkk De Lille waziwa njengesishoshuvu esilwa nenkohlakalo. Uzokhumbula ukuthi nodaba lokuthengwa kwezikhali kuleli lwapotshozelwa yena waqhumbuza ithumba, ukunukwa kwakhe ngenkohlakalo akukuhle,” kusho uMngoma.

Uthe maningi amathuba okuthi axoshwe uNkk De Lille uma izinsolo abhekene nazo ziyiqiniso.

“Kodwa ngokumazi kwami uNkk De Lille angiboni elala phansi evumela ukuthi iDA izenzele umathanda kuyena,” kusho uMngoma.

UNkk De Lille ucashunwe kwabezindaba ethi ngeke avume ukuthi akhishwe emsebenzini wakhe ngaphandle kwezizathu ezibambekayo.