Kulimale abantu kushayisana izitimela
KULIMALE abantu abangu-226 ngesikhathi kushayisana izitimela ezimbili esiteshini iGeldenhuys, eGermiston, eGauteng izolo.
UMnuz Russel Meiring wabezimo eziphuthumayo i-ER24 uthe bekunenqola yesitimela ebilele ngohlangothi kodwa ngenhlanhla akekho oshonile.
“Sithole ukuthi abantu bebeya emsebenzini ngesikhathi behlelwa yingozi, abangu-159 bahuzukile, kwathi abangu-67 balimala kanzima. Sibanikeze usizo lokuqala sabadlulisela ezibhedlela zendawo ukuze bathole olunye usizo,” kusho uMeiring.
UNkk Lillin Mofokeng, obhekele ezokuxhumana kwaMetrorail, uthe bazobasiza abalimele ngokubakhokhela izindleko zasesibhedlela nangolunye usizo abazoludinga njengoba belimele.
Namhlanje kulindeleke ukuthi usihlalo wenhlangano ebhekele ezokuphepha ezitimeleni, iRailway Safety Regulator, axoxisane nabezindaba ngengozi yezitimela eyenzeke eKroonstad, eFree State nalena eyenzeke eGermiston.
Izolo imindeni yabashone engozini yesitimela eyenzeke ngoLwesine eFree State iqhubekile nokuyokhomba izihlobo zayo njengoba kufanele yenze ulibofuzo ngenxa yokuthi zishe zangqongqa kule ngozi. Ngabantu abane abebengakahlonzwa ukuthi bangobani kwazise abasukanga naso ePort Elizabeth (PE) kodwa kuthiwa bagibela endleleni bashayelwa ithikithi ngomshini osesitimeleni.
UDkt Sipho Sithole ongusomaqhinga wakwaPassenger Rail South Africa (Prasa) uthe bayaqhubeka nokusiza imindeni yabalimele wacela abangakazitholi izihlobo zabo ukuthi bashayele u-011 013 0067.
AbeRailway Safety Regulator bathe kusaphenywa ngembangela yengozi yaseKroonstad.
EGermiston kuvele ukuthi isitimela esingu-4317 besiyalelwe ukuthi singene kwi-platform yaseGeldenhuys sase siba nezinkinga.
Kuthe sisamile kwangena isitimela esingu-0723 okusolakala ukuthi singeniswe ngumuntu onganakanga ukuthi kunesitimela esimile emzileni zase zishayisana izitimela.